ČálliidLágádus bovde girjedoaluide mat leat Litteraturhuset viesus Oslos, lágádusas leat vihtta girječálli mielde girjjiin ja golmmas almmuhit iežaset ođđa girjji.
Boahtte vahku, golggotmánu 22. beaivvi, lágiduvvojit girjedoalut Litteraturhuset báikkis Oslos. Doppe beasat deaivvadit viđain girječálliiguin geain leat davviguovllu muitalusat. Lea ČálliidLágádus mii lágida girjedoaluid. Girječállit, geat leat doppe iežaset girjjin, leat Ellen Torsdalen, Odd Marakatt Sivertsen, Per Lars Tonstad, Marie Kvernmo ja Karin Bjørset Persen.
Almmuhit girjjiid
Leat golbma girječáll geat almmuhit iežaset girjjiid dan eahkeda ja sii leat Karin Bjørset Persen iežas románain «Heksetriaden», Marie Kvernmo románain «Møtes» ja Per Lars Tonstad románain «Aldri så galt at det ikke kan bli verre». Girječállit Odd Marakatt Sivertsen ja Ellen Torsdalen boahtiba muitalit iežaska girjiid birra, romána «Galskapens farge», man Sivertsen lea čállán, ja «Mors døtre» man Torsdalen lea čállán.
Somá beassat Litteraturhusetii
Karin Bjørset Persen almmuhii iežas ođđa girjji «Heksetriaden» Troandimis golggotmánu 12. beaivvi ja dat šaddá ovttaláhkai su nubbi girjealmmuheapmi Litteraturhusetis.
– Lea issoras gelddolaš beassat almmuhit girjji Litteraturhusetis go dat lea stuorra ásahus. Lea maiddái gelddolaš beassat deaivvadit ČálliidLágádusa eará girječálliiguin ja mii leat ge viđas geat leat das mielde, dadjá girječálli Persen.
Gelddolaš buohkaide
Lea vuosttaš geardde go ČálliidLágádus čohkke girječálliid Litteraturhuset báikái ja dasa liiko girječálli bures, go dat mearkkaša ahte sámi sisdoallu boahtá oidnosii stuorraservodahkii maiddái.
– Lea buorre go min čohkkejit dohko. Dat čájeha ahte sii váldet vuhtii olles riikka ja dás leat girječállit geain lea sámi duogáš, muhto girjjit leat čállon dárogillii. Leat olu sámit geat eai hálddaš sámegiela ja lea buorre go sáhttá miehtá riikka juohkit girjjiid main lea sámi sisdoallu. Girjjit sáhttet de leat gelddolaččat buohkaide, dadjá girječálli Karin Bjørset Persen.
Girjedoalut lágiduvvojit golggotmánu 22. beaivve dii.18.00 rájes.
