Dáiddároappážagat Gáddjá ja Biret Haarla leigga oassin sámi paviljonga prográmmas Veneziabiennales. Fargga boahtiba Riddu Riđđui áibbas ođđa dánsunčájálmasain.
Dánsunčájálmas «Starting from staring» atná vuolggasadjin deaivvadeami gaskal eamiálbmoga ja majoritehtaálbmoga.
Guovddážis lea dáistaleapmi luondduriggodagaid ja kultuvrra boasttugeavaheami vuostá. Čájálmas jearrá maid mii livččii dáhpáhuvvan jus olbmot eai livčče guođđán luottaid doaimmaideamet maŋis.
Gáddjá ja Biret dánsunčájálmas lea Riddu Riđu kulturlanjas duorastaga suoidnemánu 14.b. dii 16.00 ja lávvordaga suoidnemánu 16.b. dii 12.00.
Sámi dánsunnásttit
Gáddjá ja Biret Haarla leaba šaddan dovddusin sámi dálááiggedánsumis. Jagis 2021 nammaduvvuiga «Dán jagi nuorra dáiddárin» Riddu Riđus ja dán jagi leaba ge ieža ráhkadan buktaga Riddu Sessions-prošeavttas.
Haarla-oappážagain lea jo guhkes olahuslistu. Dán geasi geargaba Performing Arts Research and Training Studios (P.A.R.T.S) nammasaš skuvllas, mii lea riikkaidgaskasaš dálááiggedánsuma skuvla Brusselis. Soai leaba ovdal studeren baleahta Suoma nationálabaleahtas Helssegis.
Ovttas leaba doallan čájálmasaid Veneziabiennales ja Helssega biennales, ja leaba ovttasbargan dáiddáriiguin, nu go Marja Helanderiin, Outi Pieskiin, Pauliina Feodoroffain ja Mari Boiniin.
Sámi taleantaprográmma
Dán jagi nuorra dáiddár/Riddu Sessions lea sámi taleantaprográmma nuorra dáiddáriidda. Dáiddárat ožžot saji dáiddalaš ahtanuššamii deaivvademiid bokte mentoriiguin, sii ožžot fágalaš čuovvoleami Riddu Riđu bealis ja šaddet oassin stuora riikkaidgaskasaš ja sámi fierpmádagas.
– Sámis lea hui ollu hábmennákca, muhto leat unnán vejolašvuođat dáiddalaš ohppui man vuođđun lea sámi kultuvra. Dan dihte lea Riddu Sessions nu dehálaš. Ollu nuorra sámi dáiddáriidda lea dá vuosttaš geardde go besset bargat sámi geahččanguovllus ovttas sámi festiválain mas maiddái lea ollu buvttadanvásáhus, dadjá festiválajođiheaddji Sandra Márjá West preassadieđáhusas.
Ovddeš dáiddárat prográmmas leat earet eará leamaš musihkar/dáiddár Emil Kárlsen, dánsejeaddji Ánna Katri Helander, slampoehta Ánná Káisá Partapuoli ja juoigi Marja Mortensson.
Dán jagi nuorra dáiddár 2022 lea mearrasámi duojár Márjá Karlsen, guhte ovdanbuktá barggus geasi festiválas. Guossit besset vásihit su «Binnáš vel!» čájáhusas ja sáhttet suinna ovttas duhppet gággása.
Riddu Riđđu lágiduvvo suoidnemánu 13.-17.b. Gáivuonas.
