Dán vahkku galledeaba guovttis Sámi ofelaččain sihke mánáidgárddi, nuoraidskuvlla ja joatkkaskuvlla Plassjes.
Sámi ofelaččaguovttos Elle Rávdná Näkkäläjärvi (20) ja Mirja Cicilia Andersson Renander (19) leaba Norgga mátkkis ja dán vahkkus leaba Plassjes.
Doppe galledeama Luvlege Maanagiertie sámi ossodaga, Plassje nuoraidskuvlla ja Plassje joatkkaskuvlla.
– Mun illudan erenomážit fitnat Mátta-Sámi mánáidgárdeossodagas go dat lea dehálaš arena gos seailluhit máttasámegiela, dadjá Mirja Cicilia Andersson Renander preassadieđáhusas.
Dárbu johtit maiddái koronaáiggis
Sámi ofelaččaid bargun lea johtit ja muitalit sámi kultuvrra ja servodaga birra. Covid-19 dagaha ahte Sámi ofelaččat ja sin koordináhtorat fertejit bures čuovvut mielde gos koronavirus leavvá ja juohke mátkki olis fertejit árvvoštallat lea go dorvvolaš vuolgit.
– Mátkkošteapmi lea stuora oassi min barggus ja pandemiija lea dieđusge váikkuhan dasa. Dattege dovdat ahte lea dehálaš oahpahit sámiid birra maiddái koronaáiggis, dadjá Elle Rávdná Näkkäläjärvi preassadieđáhusas.
Sámi ofelaččat čuvvot njoammuneastadandoaimmaid ja leat dárkilat buhtistit gieđaid ja doallat gaskka olbmuide.
