-Almmuhus-
-Almmuhus-
-Almmuhus-
OĐĐASATSámi ofelaččaid ođđa neahttasiiddu almmuheapmi

Sámi ofelaččaid ođđa neahttasiiddu almmuheapmi

-

-

Duorastaga almmuhit sámi ofelaččat ođđa neahttasiiddu. Dát dáhpáhuvva Sámi allaskuvlla 30-jagi ávvudeami oktavuođas, golggotmánu 31. beaivvi.

Samiskeveivisere.no lea ofelaččaid diehtojuohkinkanála nuoraide, ja ulbmiljoavkkus leat sihke oahppit, studeanttat ja oahpaheaddjit. Ofelašdoaibma ásahuvvui 2004:s ja ofelaččat leat dan rájes johtan viidát deaivvadan dihte eará nuoraiguin geaidda muitalit sápmelaččaid birra. Ođđa neahttasiidu šaddá dehálaš doarjjan sámi ofelaččaid bargui. 

– Dán neahttasiiddu bokte sáhttá oahpásmuvvat sámi kultuvrrain ja historjjáin, sáhttá geahččat iešguđegelágan gávttiid ja doppe lea maid gárta mas leat sámi báikenamat. Neahttasiiddus lea maid blogga man bokte sáhttá ofelaččaid árgabeaivvi čuovvut, muitala ofelaš Aina Haugon Nordfjell preassadieđáhusas maid Sámi allaskuvla lea almmuhan.

Sámi allaskuvla lea rámis dáinna ođđa neahttasiidduin.  

– Ofelaččaid neahttasiidu lea ođđa oláhus ofelaččaid barggus, hui ábas go sii galget bargguset bokte nannet nuoraid máhtolašvuođa sámi kultuvrras ja historjjás. Mun illudan čuovvut neahttasiiddu ovdáneami, dat šadda doaivumis hui ávkkálaš reaidu min čeahpes ofelaččaide. Giittán buohkaid geat leat veahkehan neahttasiiddu fágalaš sisdoaluin ja geat ain bohtet leat fárus dán barggus. Neahttasiiddu almmuheapmi rahpa maid vejolašvuođaid ráhkadit lasi neahttavuđot oahpponeavvuid ofelašdoaimma olis, cealká Laila Susanne Vars, Sámi allaskuvlla rektor.

Ain h siidduseme siiddu

Neahttasiidu rahppo vaikko ii leat vel áibbas gárvvis. Dat lea danne go das leat máŋga dehálaš beali maid ofelašdoaibma dárbbaša.   

– Okta dehálaš bealli lea go skuvllat dás rájes sáhttet diŋgot ofelaččaid guossái neahttasiiddu bokte, ja dát álkida sin plánema. Neahttasiiddus gávdnojit maid ávkkálaš dieđut maid skuvllat sáhttet atnit ráhkkanit logaldallamiidda, muitala Sámi allaskuvlla ráđđeaddi, Sara Beate Eira Persson. 

Seammás šaddá maid sámi nuoraide álkibut jus háliidit geahččalit beassat ofelašdoibmii. Neahttasiiddus gávdno ohcanskovvi ja maid eambbo dieđut doaimma birra.  

Stáhtačálli boahtá

Buot njeallje ofelačča Inga Maret, Håkon, Aina ja Maila Risten leat mielde almmuheame siiddu, ja sidjiide boahtá maid dehálaš guossi, namalassii sámi áššiid stáhtačálli Anne Karin Olli.  

– Háliidan sávvat lihkku sámi ofelaččaide ođđa neahttasiidduin mii álkida diehtojuohkima mánáide ja nuoraide ođđaáigásaš sámi kultuvrra ja servodaga birra. Lea dehálaš ahte dieđut sámiid birra leat olámuttos, ja danne lean ilus go sámi ofelaččat áigot boahtteáiggis maid ráhkadit digitála sisdoalu, dadjá stáhtačálli Anne Karin Olli preassadieđáhusas. 

-Almmuhus-