Boahtte vahku galledit Sámi ofelaččat Romssa skuvllaid.
Vuossárgga 30.01.17 rájes áiguba ofelaččat Ole Nicklas Mienna Guttorm ja Oda Kjær Eriksen galledit Romssa joatkkaskuvllaid ja maiddái Árktalaš Universitehta gos muitaleaba sámi kultuvrra ja servodaga birra.
Ofelaččat leat logaldallan skuvllain Mátta-Norggas, sihke oarjin, nuortan ja lulde, muhto eai vel leamaš dán skuvlla jagi ná davvin.
Besset davvisámis maid johttit
– Romssa fylka han lea Davvi-Sámi guovllus, nu ahte sihkkarit leat máŋggas dáppe geat dovdet sámi kultuvrra, muhto sihkkarit leat maid nuorat geat eai dieđe nu ollu. Ofelašdoaibma han lea maid dan dihtii ahte muitalit eanet sidjiide geain lea ovdalaš diehtu oalle muddui, lohká Ole Nicklas.
Sámi ofelaččat leat golggománu rájes galledan iešguđet skuvllaid Norggas ja vásihan ahte lea iešguđet dássi ohppiid máhtus sámi kultuvrra birra.
– Mii leat ožžon hui ollu buriid kommentáraid nuorain geaidda leat logaldallan, máŋggas leat boahtán mu lusa maŋŋá logaldallama ja lohkan ahte mii bargat buori barggu ja sii leat oahppan mis hui ollu, lohká Ole Nicklas.
Nuorat liikojit
Ofelaččat vásihit ahte nuorat liikojit go leat sámi nuorat ieža geat muitalit sidjiide sápmelaččaid birra.
– Go mii leat johtán eanaš lullin, de eai ohppiin leat nu ollu iežaset jurdagat sámiid birra earret dan maid leat oaidnán medias. Romssas jáhkán ahte ohppiin leat eanet iežaset oaivilat danin go dat han lea Davvi-Sámi guovllus.
– Šaddá somá deaivvadit ja ságastallat ohppiiguin Romssas, dasa illudan, lohká Oda guhte boahtá Julevsámi guovllus.
