Sámi našuvnnalaš geavaheddjiidráđđi ásahuvvon

Sámi našuvnnalaš geavaheddjiid­ráđđi ásahuvvui sámi geava­heddjiid­ovddasteddjiid oktasaš čoahkkimis Romssas skábmamánu álggus. Ráđi váldobárgu lea nannet sámi vuoigatvuođaid dearvvaš­vuođa ja fuolahussuorggis.  Ráđđi ásahuvvui ovttas SÁNAGin.

Čohkken buot ovddasteddjiid

Oktasaščoahkkimis Romssas ledje Sámi geavaheddjiid­ovddas­teaddjit, mat gullet Davvi Dearvvašvuhtii, SÁNAG geava­headdjiráđđi ja SÁNAG jođi­headdji Gunn Heatta.

 Ulbmil čoahkkimiin lei čohkket buot ovddasteddjiid mat gullet Davvi Dearvvašvuhtii. Ja dán čoahkkimis sii mearridedje ge ásahit sámi našuvnnalaš geavaheaddjiráđi.  Čoahkkimis digaštalle movt sáhttet rekrutteret sámi geava­heddjiid ja movt sin galgá buore­musat ávkkástallat.

Buoret fierpmádaga sámiide

Gunn Heatta muitala Finn­márkku buohcceviesu ruovttu­siiddus ahte geava­headdjiid­ovddas­teaddjit geat nammaduvvo­jit servviid bokte, ožžot doarjaga searvvis. Muhto sámi geavaheddjiidovddas­teddjiin geat eai leat geavaheddjiidserv­viin, váilu sullasaš vejolašvuohta oččo­dit ráđiid ja doarjaga.

 Sámi našuvnnalaš geava­heddjiidráđi ulbmil lea ge fállat buoret fierpmádaga sámi geavaheddjiide. Sámi našuvnnalaš geava­heddjiid ráđđi mii maid fátmmasta SÁNAG geavaheddjiid­ráđi galgá ovttasbargagoahtit SÁNAGin.

Ráđđi galgá earret eará ovddidit sámi áššiid ja beroštumiid našuvnnalaš dearvvašvuođaforain.

 – Vai oažžut buoremus lági mielde dieđuid áššiid birra mat dáhpáhuvvet olggobeale Davvi Dearvvašvuođa de háliidat mii fátmmastit maiddái geavaheddjiid­ovddasteddjiid spesialista- ja gielddadearvvašvuođabálvalusas mat gullet eará dearvvaš­vuođa­guovlluide, čállá DjO-ráđđeaddi ja SÁNAG geavaheddjiidráđi čálli Renathe Aspeli Simonsen Finnmárkku buohcceviesu ruovttu­siidui. 

Geavaheddjiidráđđi

Sámi našuvnnalaš geavaheddjiid­ráđđái leat muhtumat jerron searvat ja earát ges leat namma­duvvon geavaheddjiid­servviid bokte. 

 Miellahtut geat leat ráđis, leat Else Marie Isaksen (Regiovn­nalaš geavaheddjiidráđđi, Davvi dearvvašvuohta/Finnmárkku buohcce­viessu), Nina Nedrejord (Geavaheddjiidsearvvis Davvi norgga buohcceviessu), Inga Karlsen (Geavaheddjiidsearvvis, Nordlándda-buohcceviessu), Marit Madsen (Sámi várrelahttu, geavaheddjiidsearvvis, Norlándda-buohcceviessu), Ellen Sara Sparrok Larsen (Geavaheddjiid­searvvis Helgelándda-buohcce­viessu), Tom-Kristian Hermo (SÁNAG geavaheddjiidráđđi), Piere Bergkvist (SÁNAG geava­heddjiidráđđi), Elen Ravna (SÁNAG geavaheddjiidráđđi, June Gerd A. Johnsen  (SÁNAG geava­heddjiidráđđi) ja Ingrid Jåma (SÁNAG geavaheddjiidráđđi).