Geassemánu 10.–19. beivviid lágiduvvojit Heddabeaivvit 2022 Oslos, gosa earret eará Sámi Našunálateáhter Beaivváš lea mannamin ovdanbuktit.
– Viimmat lágiduvvojit Heddabeaivvit, nuppelohkái beaivvi galgat deavdit oaivegávpoga lávddiid ja sálaid, go de galget eambbo go 45 čájálmasa čájehuvvot, fágadoalut ja seminárat lágiduvvot. Leat hui ilus go Sámi Našunálateáhter maid oassálastá daidda ávvudemiide! čuožžu Sámi Našunálateáhter Beaivváža preassadieđáhusas.
Heddabeivviid galget čájehit: «Guovžža vuoššat» (Mikael Niemi) čájálmasa – geassemánu 17. beaivvi, Det Norske Teatret lávddis. Čájálmasas, mii šattai olgočájálmassan, lei álgočájálmas Guovdageainnu gilišiljus njukčamánus diibmá, ja lei ge maid teáhtera ávvočájálmas.
Heddabeaivvit leat Norgga teáhterfestivála, ja čohkke teahterčájálmasaid miehtá riikka čájálmasaide, doaluide ja fágaprográmmii Oslos.
