Sámi museat leat nu heajos stánddas ahte eai nagot váldit vuostá dan 2000 kulturárbbi maid Norgga álbmotmusea máhcaha.
Sámi museat leat nu heajos stánddas ahte eai nagot váldit vuostá dan 2000 kulturárbbi maid Norgga álbmotmusea máhcaha.
2012:s vuolláičálii Norgga Álbmotmusea ja Kulturhistorjjálaš musea historjjálaš šiehtadusa Sámedikkis ahte bealli museaid 4000 sámi dávviriin galget máhccat ruovttoluotta sámi museaide.
Prošeakta galggai gárvánit giđđat, muhto dál orru maŋŋoneame, čállá Klassekampen.
Váilu ruhta divodeapmái
Šiehtadusas čuožžu ahte dávvirat eai galgga biddjot heajut vuorkkáide go Norgga Álbmotmusea vuorká lea.
Dalle mielddisbuktá ahte buot dat guhtta sámi musea fertejit divoduvvot, ja dasa ii leat museiin dahje Sámedikkis ruhta.
– Ovddasvástádusas beasadit
Sámediggi lea bivdán Kulturdepartemeanttas veahki, muhto searvat prošektii ii leat oassin ráđđehusa 2018 stádabušeahta evttohusas.
– Dat lea beasadeapmi ovddasvástádusas. Kulturdepartemeanta ii oro oaidnime ovddasvástádusa čalmmustahttit Norgga eamiálbmoga, lohká RiddoduottarMusea direktevra Anne May Olli, gii ovddasta njealji dain sámi musea.
Klassekampen ii leat nagodan oažžut kommentára Kulturdepartemeanttas.
(©NTB)
