-Almmuhus-
-Almmuhus-
-Almmuhus-
OĐĐASATSámi mánát vuoruhuvvojit gáržžes sámediggebušeahtas

Sámi mánát vuoruhuvvojit gáržžes sámediggebušeahtas

-

-

Sámediggeráđđi almmuhii odne iežas bušeahttaevttohusa Sámediggái 2016 jahkái. Ráđđehusa stáhtabušeahttaevttohusas gáržžiduvvojit rámmat sámi servodaga ovddideapmái, dát váikkuha maiddái sámediggebušehttii.

– Bušeahta geažil fertet unnidit doaimmaid sámi servodagas, muđui gal stáhtabušeahtta lea sakka ovdánan. Muhto mun lean duhtavaš go mii hui gáržžes rámmaid siskkobealde leat nagodan vuoruhit doaibmabijuid nannet sámi giela, erenoamážit mánáid ja nuoraid ektui. Midjiide lea deaŧalaš láhčit diliid nu ahte mánát galget oahppat eanet sámepolitihka ja demokratiija birra, deattuha sámediggeráđđi Ann-Mari Thomassen.

Sámediggeráđi sámediggebušeahttaevttohusas 2016 váste lea gollorámman 434 miljon ruvnno oktiibuot. Dat lea 5,6 miljon ru eanet go 2015 reviderejuvvon bušeahtas, muhto go rehkenastá hadde- ja bálkágoargŋuma ektui, de lea bušeahtta duohtavuođas njiedjan 0,5 % go buohtastahttá ovddit jagi bušeahtain.

 

Jotket riikkaidgaskasaš bargguin

Thomassen deattuha ahte Sámedikki bušehttii ja sámi servodahkii čuohcá hui ollu ráđđehusa váilevaš dáhttu dohkkehit dárbbuid sámi servodagas.

Son čujuha dasa go ráđđehus áigu deattuhit davviguovlluid ja gieldaođastusa, de mielddisbuktá dat eanet hástalusaid ja deattu sámi servodahkii.

– Dát lea earret eará duogážin dasa go Sámediggeráđđi maiddái 2016:s evttoha joatkit davviriikkalaš ja riikkaidgaskasaš álgoálbmotbarggu alla aktivitehta dásis. Mihttomearrin lea konkretiseret sámiid ja eará álgoálbmogiid vuoigatvuođaid nana searvama bokte riikkaidgaskasaš mearrádusproseassain. Mii oaidnit ahte álgoálbmogiid ja sin vuoigatvuođaid ovdáneamis riikkaidgaskasaččat, lea konkrehta mearkkašupmi Norgga sámepolitihka ja sámi vuoigatvuođaid ovdáneapmái báikkálaččat gielddain ja sámi ássanguovlluin, dadjá Thomassen.

 

Loga maid: Álggahit sámedikki mánáide

 

Vuoruhit gielladoaimmaid

Doaibmabidju «mánáid sámediggi» evttohuvvo ruhtaduvvot 400 000 ruvnnuin. Sámediggi evttoha vuoruhit barggu mii galggašii oččodit eanet vánhemiid geavahit sámegiela váldogiellan mánáidasaset. Ráđđi evttoha muđui ahte ásahuvvo ođđa giellaarena joatkkaskuvlla nuoraide geat váldet sámegiela.

Juolludus sámi giellaguovddážiidda evttohuvvo lasihuvvot 4 miljon ruvnnuin. Juolludusat sámi kulturásahusaide evttohuvvojit lasihuvvot 1,7 miljon ruvnnuin.

– Juolludus máttasámi kulturfestiválii šaddá njealjegeardásaš boahtte jagi. Dieinna lágiin leat mii válljen vuoruhit surggiid gos dárbu lea stuorámus. Muhto mu mielas gal lea hui unna doaibmamunni Sámedikki 2016 bušeahtas, dadjá Ann-Mari Thomassen.

 

Eanet sámediggebušeahta birra beasat maid lohkat ihttá báberáviissas.

 

 

-Almmuhus-