Searvi lea sorjjasmeahttun bellodatpolitihkas, ja galgá ovddidit sámi ja sámegielat juristtaid ja juridihka studeanttaid beroštumiid.
– Lea dehálaš ahte sámi riekteperspektiiva loktejuvvo oidnosii iešguđet arenaid siskkobealde servodagas. Min mihttomearri lea digaštallat ja čalmmustahttit sámi vuoigatvuođaid servodatdigaštallamis, lohká Sámi láhkačehpiid searvvi stivrajođiheaddji Helge Ravna preassadieđu bokte.
Searvvi ulbmil lea nannet miellahtuid gelbbolašvuođa sámi rivttiid birra, ja dasa lassin searvi galgá leat arenan gos digaštallet sámi riektái guoskevaš áššiid.
Searvvis háliidit maiddái iežaset miellahtuid ovddas hupmat áššiin main lea lunddolaš, earet eará gulaskuddancealkámušaid bokte.
– Leat muđui ollu áššit main mii oaivvildit ahte sámi juristtain galggašii leat oktasaš, sorjjasmeahttun jietna. Ovdamearkka dihte sámegielaid nannen vuoigatvuođahálddašeamis ja sámegiela ovddideapmi riektegiellan leat áššit maiguin mii háliidit bargat, lohká Ravna.
Sávvet bures boahtima
Helge Ravna lea searvvi stivrajođiheaddji, Silja Haldorsen lea nubbejođiheaddji. Muđui stivrras leat Lizett Nathalie Persen, Anders Broderstad ja Iris Nathalie Wigelius.
Dál sávvet searvvis ahte miellahtuid lohku lassána.
– Buot sáme- ja sámegieljuristtat, juridihkkastudeanttat leat bures boahtimat šaddat miellahttun. Mii sávvat oažžut nu olu go vejolaš miellahtuid, dadjá Helge Ravna.
Searvvi e-boasta lea samiskjuristforening@gmail.com. Sámi láhkačehpiid searvi vuođđuduvvui geassemánu 27. beaivvi dán jagi.
