Viestterálas lágidit Reginebeaivvit dán vahkku mas sámi kultuvra ja historjá čalmmustahtto guovllus gos sámivuohta ii leat nu oidnosis.
Viestterálas lágidit Reginebeaivvit dán vahkku mas sámi kultuvra ja historjá čalmmustahtto guovllus gos sámivuohta ii leat nu oidnosis.
Reginebeaivvit lágiduvvojit Bø báikkis Viestterálas, doppe gos girječálli Regine Normann lei eret. Festivála álggii lávvordaga suoidnemánu 21.beaivvi ja bistá gitta 29.beaivái.
Sámi kultuvra hui guovddážis
– Mii vuoruhat sámi historjjá mii lea guovllus. Fágaseminára «Regine Normann sámi eatnamiin» lea oassi mii čuvge dán oasi. Maiddái Skániid girjie almmuha sin ođđa girjji «Just Qvigstads lappiske ordbok fra Kaldfjorden og Vesterålen», mii lea sámi sátnegirji Gállafierda ja Viestterálas Just Qvigstad čállosiid vuođul, muitala festiválajođiheaddji Elrid Pedersen festiválaaviissas.
Maiddái sámi artistat prográmmas. Ina Oskal Alexandersen ja Inger Johanne Oskal leaba čuojahan rahpanbeaivvi mii lei lávvordaga ja doallan girkokonseartta sotnabeaivvi eahkedis.
Duorastaga doallá Kevin Boine guokte konseartta. Vuosttaš konsearta lea alkoholakeahtes ja nubbi konsearttas mii álgá easka gaskaija áigge, guossohuvvo alkohola.
Girječálli Gerd Mikalsen muitala girjji birra «Farsmålet» mii lea sámi giela ja identitehta birra. Doalut lea girjerádjosis.
Čiŋaha Reginebeivviid luđiiguin
Harald Steffensen jođiha vázzinmátki ja muitala dološ muitalusaid sámi eatnamiid birra Viestterálas. Muitaleapmái galgá Biret Alette Mienna juoigat ja lávlut.
Biret Alette Mienna lea maid mielde lágideame teáhterbáji mánáide ja nuoraide, ovttas Tom-Stian Lenningsvikain.
Mánát besset gullat eanet stáluáhkuid ja čáhcerávggaid birra, ja besset oahppat juoigat. Oahpahuvvo rollabarggu birra ja movt geavahit luođi teáhteroktavuođas. Loahpas besset mánát čájehit dan maid leat oahppan teáhterbajis.
Lars Monsen maid galleda
Muđui lágidit olgoipmilbálvalusa, gielistaneahkeda, Sinahoallomátki, máinnasbálggis, márkanat, ja sotnabeaivvi lágiduvvo lassi márkanbeaivi go Lars Monsen boahtá vácci.
Regine eallin
Regine Normann lei vuosttaš girječálli Davvi-Norggas eret gii beaggigođii almmolaččat norgalaš girjjálašvuođas, ja son lei buorre ustit dovddus girječálliin Sigrid Undsetain. Normann vádjolii 1939. Son lea ollu románaid almmuhan. Vuosttaš romána lei «Krabvaag».
Juohke geasi lágiduvvo dát festivála mii lea kulturfestivála man vuođđu lea máinnasteaddji Regine Normann eallin ja dikten.
