Sámediggeráđđi lea beahttašuvvan go lávdegottis, mii galgá ovdánahttit kulturturismma, eai leat ovtta ge sámi fitnodaga bovden mielde lávdegoddái.
Sámediggeráđđi lea beahttašuvvan go lávdegottis, mii galgá ovdánahttit kulturturismma, eai leat ovtta ge sámi fitnodaga bovden mielde lávdegoddái.
Ráđđehus lea ásahan Ovttasbargoráđi kultuvrra ja mátkeealáhusaid várás, nannen dihtii áŋgiruššama kulturturismmain Norggas.
Sámediggeráđđi Mariann Wollmann Magga lea beahttašuvvan go son oaidná, ahte lea ásahuvvon lávdegoddi mii galgá addit ráđđehussii rávvagiid kulturturismma birra, almmá ahte sámi mátkeealáhusat ja sámi kulturealáhusat leat mielde mandáhtas.
Cealkámuša kultur- ja mátkeealáhussuorggis
– Dáin ealáhusain leat stuorra vejolašvuođat ahtanuššat ja ekonomalaččat ovdánit sámi guovlluin. Ollu fitnodagat háliidit geavahit sámi kulturvuđđosa muhtun hámis fitnodaga ovddideamis, ja danne lea deaŧaleabbo go goassige ovdal atnit fokusis eaktivuođa ja etihkalaš beali, cealká Magga preassadieđáhusas.
Ovttasbargoráđi kultuvrra ja mátkeealáhusaid várás, mandáhtas fokuserejuvvo ovttasbargu mátkeealáhus- ja kulturaktevrraid gaskka, gávppálaš vejolašvuođain ovdánahttit kulturturismma. Ráđđi galgá buktit cealkámuša das movt sáhtášii nanosmahttit politihka hábmema kultur- ja mátkeealáhussuorggis.
Ledje alla vuordámušat
Ráđis leat 17 lahtu. Okta sis lea Maria Utsi Davvi-Norgga riemuin.
– Lihkus lea Maria Utsi, geas lea gelbbolašvuohta sámi kulturealáhusaid siskkobealde, mielde joavkkus, muhto mun oaivvildan ahte mandáhta gal lea láivi, dadjá Magga.
– Maŋŋá go lean searvan Grüne Woche meassuide, máilmmi stuorámus biebmomeassuide, de ledje mus stuorát vuordámušat ráđđehusa viidáset bargui go dat mii dál lea duohtavuohta, šuohkiha Magga loahpas.
