Ruoŧa girku Sámi ráđđi geige kulturbálkkašumi ubmisámegielat giellaberošteaddjái Henrik Barrukii.
Ruoŧa girku Sámi ráđđi geige dán jagi kulturbálkkašumi Henrik Barrukii, gii lea áŋgirit bargan ja ealáskahttán ubmisámegiela. Barruk lea Kanaanis eret, Gäjka suohkanis Västerbottena leanas.
Giellaberošteaddji Henrik Barruk lea earret eará almmuhan ubmisámegielat sátnegirjji ja bargan ubmisámegiela čállinvuogi ovddidemiin. Son lea maiddái bargan sámi kultuvrra ovddidemiin Ruoŧa girkus, čállá Ruoŧa girku preassadieđáhusas.
– Barruk lea váikkuhan sámi girkoeallima ja sámi vuoiŋŋalašvuođa ovddideapmái ja čalmmustahttimii earret eará jorgalahttinbargguid bokte, go lea jorgalan ruoŧa sálmmaid ubmisámegillii, dadjá Sámi ráđi ságadoalli Ingrid Inga.
Ruoŧa girku Sámi ráđi kulturbálkkašupmi lea juhkkojuvvon 1997 rájes ja bálkkašupmi lea 50 000 Ruoŧa ruvnno.
