Olles vahkku galget ságastallat ja logaldallat sámi ja kvena girjjálašvuođa birra Norgga girjjálašvuođaviesus.
– Dáhpáhusat maŋemus vahkuid leat čájehan ahte mis našuvdnan ain lea guhkes geaidnu ovdal lea lassánan máhttu ja ipmárdus sámi kultuvrii, gillii ja historjái. Litteraturhuset lea máŋga jagi juo bidjan fuomášumi sámi girjjálašvuhtii ja kultuvrii, sihke mánáide, nuoraide ja rávisolbmuide. Dál mii viiddidit dien nannema ja deavdit Litteraturhuset sámi ja kvena/norggasuopmelaš girječálliiguin, dáiddáriiguin ja aktivisttaiguin, dadjá Litteraturhuset vuođđudusa jođiheaddji Susanne Kaluza preassadieđáhusas.
Cuoŋománus lágiduvvo
Festivála «Alt dette er min heim – samiske og kvenske/norskfinske litteraturdager» álgá mánnodaga cuoŋománu 17. beaivvi ságastallamiin masa Davviriikkaid Ráđi girjjálašvuođabálkkašumi evttohasat Ingeborg Arvola ja Tove Nilsen searvaba. Arvola románas «Kniven i ilden» čuovvu son iežas kvena máttu Brita Caisa Seipajærvi.
– Ingeborg Arvola lea čállán mearkkašahtti girjjálašvuođa smávva ja vealahuvvon oasáža birra Norgga historjjás, ja mii leat nu rápmásat go beassat suinna rahpat festivála. Čájehuvvo ahte oallugat leat sáhkkit fáddái, ja dasa makkár rolla girjjálašvuođas sáhttá leat ovdanbuktimis dáid historjjáid ođđa perspektiivvas. Dan oaidnit go son lea ožžon hirbmat stuora beroštumi sihke lohkkiin ja sis geat nominerejit ja addet bálkkašumiid, dadjá Kaluza.
Hárve gullat sin birra
Son čállá ahte festivála lokte sámi ja kvena kultuvrra iešguđet šáŋŋeriid ja hámiid bokte, ja sis lea feara mii prográmmas.
– Sáhttá namuhit ahte govvadáiddár ja poehta Synnøve Persen, gii maid lei okta nealgudeddjiin Álttá- akšuvnnas, boahtá. Frank Jørstad ja Teodor Hansen Kvenateáhteris galgaba humadit «Det usynlige folket» čájálmasa birra. Ellos Eatnu – La elva leve -filbma galgá maid čájehuvvot.
– Deike bohtet olbmot geat gullet Norgga ja Sámi njunuš ja eanemus gelddolaš girjjálaš jienaide, geaid birra hárve gullat lulábealde poláragierddu, dadjá Kaluza.
