Máilmmidovddus hockey-násti Börje Salming lea eretvádjolan.
Salming riegádii Gironis 1951:s gos maiddái su hockey-beroštupmi bođii. 1973:s son oaččui fálaldaga speallat Kanáda joavkku ovddas ja šattai stuorá beakkálmassan Torontos. 1996:s lei son vuosttáš Ruoŧa hockey-spealli gii beasai valáštallama «Hall of fame:ii».
Börje Salming ovddastii Ruoŧa Tre Kronor joavkku njealji máilmmemeašttirgilvvuin, golmma Kanáda cupain ja olympiagilvvuin 1992:s.
Skábmamánu álggus lei son Torontos vuostáiváldime gudni iežas hockey-olahusaid ovddas. Maiddái Ruoŧas ledje doalut skábmamánus gos ávvudedje beakkálmasa.
Buozalmasvuohta
Mannan geasi muitalii Börje Salming ieš ahte son lea buohcagoahtán nearvadávddain ALS. Dávda čuozai garrasit Salming dearvvašvuhtii ja loahpas lei sutnje váttis sihke vázzit ja hupmat.
Börje Salming gulai Sarri sohkii. Su máttuid ruovttubáiki lei Čoalbmi, Duortnosjávrri davábealde, dieđiha oddasat.se.
