Jienastanmoivvi geažil masse olu olbmot vejolašvuođa jienastit Sámi Grand Prix gilvaleddjiid. Dán duođašta Guovdageainnu Lagasradio (GLR) redaktevra
Beassášlávvordaga Sámi Grand Prix (SGP)- gilvvus lei Guovdageainnu Lagasradios ovddasvástádus álbmoga jienastepmái ja web-sáddagii. Muhto lei hirbmat jienastanmoivi sihke juoigan- ja lávlunoasis.
– Eai leat buot jienasteamit registrerejuvvon, dadjá GLR-hoavda Nils Martin Kristensen Ávvirii.
Sihke dihtoris ja telefuvnnas
Olbmot vásihedje ahte jienastanboallu ii doaibman nu go galggai, ja nuppit fas besse dušše siidui gos galggai jienastit. Dát váttisvuohta galgá lea sihke dihtora ja telefovnna bokte čuožžilan.
– Olbmot leat váldán oktavuođa minguin go ii doaibman. Muhtumat fas doivo sii leat jienastan, muhto eai ožžon dieđu ahte lei dohkkehuvvon, dadjá Kristensen.
Njulget ášši
GLR-hoavda ii loga diehtit vuos sátta- ja gehččiidloguid, muhto muitala sis diimmá ektui ledje dál golmma geardde eambbo guldaleaddjit. Liikká son ii oainne váttisvuohtan ahte eai buohkat beassan jienastit vaikke livččii sáhttán dát váikkuhit čuoggáide.
– Mun ádden gal ahte leat beahtahallan, muhto olbmot hal gal beahtahallet go lea heajos neahtta juo muđui, ja jus eai beasa duon dán siidui. Nie lea eallin, in sáhte maidege dainna dál šat dahkat eará go njulget ášši boahtte jahkái, dadjá Kristensen.
Sii lohket diehtit dál ahte Iphoniiguin leamaš váddáseamos jienastit. Dihtorjienasteamis gal galgá sin dieđuid mielde buot doaibman.
Ballá manahan vuoittu
Lávlunoasi vuoiti Nils Henrik Buljo ja nuppi saji vuoiti, Háldi joavkku, eai earuhan go guokte čuoggá. Háldi ja goalmmát saji gaskkas ledje ges njeallje čuoggá. Hálddi buvttadeaddji Trond Even Kaaby, dahje«Treven», ballá vuoittu manahan dán geažil.
– De balan. Dieđán ollugiid geat eai beassan min jienastit moivvi geažil. Dát lea surgat, go livččii dieđus somá vuoitit. In čiegat dan, dadjá Treven.
Treven vikkai ieš maid jienastit, muhto ii lihkostuvvan. Son muitala diibmá maid vásihan dán moivvi Guovssahas joavkkuin SGP:s. Danne ávžžuha lágideddjiid duođalaččat váldit ášši.
Áigu lonuhit vuogádaga
Sámi musihkkafestivála jođiheaddji Nils Johan Vars diehtá maid olu olbmuid geat eai beassan jienastit. Dál lohká fertet veardidit lonuhit vuogádaga.
– Muhtun telefovnnain eai sáhttán jienastit, muhtumat gal besse siidui, muhto de ii oidnon sáddenboallu šat. Lea leamaš dan duohken makkár veršuvdna neahttalohkkis lea. Lea buoridanmunni mis ja lea áibbas čielggas ahte jienastanvuogádat ferte doaibmat, dadjá Vars
Son ii loga jáhkkit moivvi váikkuhan mange láhkai bohtosii.
– Dát vuogádat ii leat doaibman goappáge jovkui. Sihke Nicko ja Háldi leamaš seamma bárttis, ja jáhkán Nickos leamaš maid fánssat geat eai leat beassan jienastit, dadjá Vars.
