Nu go ovddit jagiid ge, de árvvoštallá Ávvir dán jagi maid Sámi Grand Prix lávlunoasi, lávlagis lávlagii.
Musihkkaoasi árvvoštallá sámi musihkkár ja golmma geardde Sámi Grand Prix lávlunoasi vuoiti, Johan Kitti. Kitti lea beassan gullat lávlagiid buori áiggis dán jagi, go buot lávlagat leat almmuhuvvon Spotifys jo máŋga vahkku ovdal gilvvuid.
Dasa lassin lea Ávvira árvvoštalli čuvvon generálageahččaleami gos lea dahkan maŋemus veardidemiid ja árvvoštallamiid.
Mirja Palo – Hilla
Teaksta/šuokŋa: Mirja Palo
Mirja Palo lea čállán sihke sániid ja šuoŋa dán lávlagii.
«Hilla» lea dakkár jaskes balládalávlla. Lávlus lea buorre ja čielga lávlunjietna mii heive bures lávlagii. Lávlagis lea maid buorre melodiija ja lea bures komponerejuvvon. Dat lea maid dakkár lávlla masa guldaleaddji sáhttá liikot dahje ii liikot. Ferte maid moddii guldalit ovdal go lávlla darvána millii. Vaikko lávlla lea bures ráhkaduvvon, de in jáhke ahte dát lávlla olle nu bajás dán jagáš gilvvus.
Aili – Bajimusas (Rooftop)
Teaksta/šuokŋa: Aili Kathrine Wergeland Teigmo, Ilja Eriksson
Aili Teigmo lea čállán teavstta ja šuoŋa ovttas Iija Erikssoniin.
Lávlagis lea buorre ritma ja lávlla darváná ovttatmano millii go dan guldala. Lea maid álki muitit ja čuovvolit lávlaga. Lávlagis lea maid buorre refreaŋŋa mii lokte lávlaga vel eanet. Lávlus lea earenoamáš buorre jietna mii maid lokte lávlaga bures. Dát poplávlla lea bures komponerejuvvon ja jáhkán ahte dát lávlla gullo ollu maŋŋel dán gilvvu. Lea maid vejolaš ahte lávlla sáhttá leahkit dán jagáš vuoiti dahje dat faskeha nuppi saji. Buorre lávlla.
Iŋgá-Máret Gaup-Juuso – Dovdameahttumii
Teaksta/šuokŋa: Ylva Persson, Linda Persson, Paul Dubrovsky, Ingá-Máret Gaup-Juuso
Lávlaga «Dovdameahttumii» lea Ingá-Máret Gaup-Juuso ovttas čállán Ylva Perssoniin, Linda Perssoniin ja Paul Dubrovskyin.
Dát lávlla lea dakkár lávlla mii dakkaviđe darváná milli go dan guldala. Lávlagis lea buorre refreaŋŋa ja luohti lea guovddážis. Lávlus lea maid buorre jietna ja dan gal maid gullá ahte Ingá-Máret lea hárjánan juoigi. Lávlla «Dovdameahttumii» lea bures komponerejuvvon ja musihkka lea bures heivehuvvon luohtái. Mun jáhkán dán lávlaga olahit vuosttaš dahje nuppi sadjái dán gilvvus. Dat mii lea čielggas lea ahte dát lávlla boahtá čuojahuvvot ja gullot ollu rádios. Oanehaččat sáhttá dadjat ahte lea buorre lávlla.
Elin & The Woods – Dát vuovdi
Teaksta: Elin Kåven
Šuokŋa: Elin Kåven, Robin Lynch
Dán lávlaga leaba Elin Kåven ja Robin Lynch ovttas čállán.
Dát lávlla, «Dát vuovdi», lea dakkár lávlla masa guldaleaddji sáhttá liikot dahje ii liikot, go dan guldala. Lávlla lea dakkár etnolávlla mii lea vehá earenoamáš. Lávlagis gullojit ollu earálágan ja earenoamáš jienat mat sáhttet dahkat dan ahte lávlla muhtumin orru leamen vehá moivvas. Muđui lea lávlla bures komponerejuvvon ja das lea buorre melodiija. Refreaŋŋa maid darvána millii go dan gullá. Dát lávlla lea sihkkarit golmma buoremusa searvvis dán gilvvus.
Natalie Carrion – Daelviejijje
Teaksta/šuokŋa: Natalie Carrion
Natalie Carrion lea čállán sihke sániid ja šuoŋa dán lávlagii.
Lávlla, «Daelviejijje» lea dakkár pop/disco lávlla mii maid darvána dakkaviđe millii go dan gullá. Dat dahká dan ahte lávlaga muitá maŋŋel go lea guldalan dan. Lávlus lea buorre lávlunjietna mii maid lokte lávlaga. Dát lávlla lea bures komponerejuvvon ja melodiija lea buorre. Jáhkán maid dán lávlaga gullot ollu maŋŋel gilvvuid. Vaikko lávlla lea ollislaččat buorre, de in jáhke ahte dát lávlla lea dán jagáš vuoiti. Dát lávlla soaitá olahit golmma buoremusa jovkui, muhto goalmmát saji ovddas lea garra gilvu.
Soá – Áiggi mielde
Teaksta/šuokŋa: Ellinor Skartland, Andreas Gundersen.
Ellinor Skartland lea čállán dán lávlaga ovttas Andreas Gunderseniin. Lávlla, «Áiggi mielde» lea ođđaáigásaš poplávlla mas lea čáppa melodiija. Lávlla lea bures komponerejuvvon ja das lea čáppa musihkka mii darvána millii go dan guldala. Lávlus lea maid buorre lávlunjietna. Vaikko lávlla lea buorre, de lea juoga mii váilu dán lávlagis. Lávlla ii riekta loktan ja juogaládje de sáhttá dát lávlla jávkat eará lávlagiid gaskii. Guldaleaddjit eai soaitte muitit lávlaga eará lávlagiid gaskkas ja dat dahká dan ahte lávlla ii olat golmma buoremusa searvái dán gilvvus. Liikká dáidit mii gullat ollu dán lávlaga rádios čuojaheame boahtteáiggis.