Dát guhtta luođi ja guhtta lávlaga gilvalit beassášlávvordaga Sámi Grand Prix lávdde alde.
Lágideaddjit leat dán jagi ge, nu go diibmá, almmuhan SGP luđiid ja lávlagiid ovdagihtii, ja daid lea vejolaš guldalit Spotifys bearjadaga rájes.
Juoiganoassi
Anders Isak Oskal – Sárá Májjá
Anders Isak Oskal – Sárá Májjá. Searvá njealját geardde Sámi Grand Prixii. Ovdal searvan 2011, 2012 ja 2015, muhto ii leat goassege vuoitán. Juoigá iežas ristnieidda, Sárá Májjá. Preassagovva: DRAGAN CUBRILO / MOTIONMOTIONMOTION
Heli Aikio – Piegâkandâ
Anáraš Heli Aikio dahje Piätárii Kaabi Isá Ooni Heli lea ovdal searvan SGP juoiganoassái 2017 ja 2019. 2014 searvvai son lávlunoassái ja vuittii Aila Duo joavkkuin. Dál searvá leu’ddain Piegâkandâ. Preassagovva: DRAGAN CUBRILO / MOTIONMOTIONMOTION
Iŋgor Nila – Johan Nils Bedar
Iŋgor Nila dahje Iŋgor Ántte Nils Peder lea Guovdageainnus eret. Son lea njealje geardde ovdal oassálastán SGP juoiganoasis ja 2019 bođii goalmmádin. Son almmuhii luohteskearru 2020:s. Preassagovva: DRAGAN CUBRILO / MOTIONMOTIONMOTION
Saara Hermansson – Goeksege
Mátta-Sámi nieida Stornäs ja Klimhpie guovllus eret searvvai 2018 ja 2019 lávlunoassái, ja vuittii dan 2019:s. Dál lea vuosttaš geardde mielde juoiganoasis. Preassagovva: DRAGAN CUBRILO / MOTIONMOTIONMOTION
Nils Johan Gaup – Lise Merethe
Guovdageaidnulaš ja Juoigalasat searvvi jođiheaddji lei vuosttaš geardde mielde 2021:s. Dál searvá nuppes SGP juoiganoassái. Preassagovva: DRAGAN CUBRILO / MOTIONMOTIONMOTION
Astrid Tuorda – Unnaviellja
19-jahkásaš Randijaur nieida, guhte orru Gironis, lei mielde SGP Cover prošeavttas, dál searvá ieš vuosttaš geardde SGP juoiganoassái. Son lea diibmá almmuhan luohteskearru. Preassagovva: DRAGAN CUBRILO / MOTIONMOTIONMOTION
Lávlunoassi
Aili – Duostil (Brave)
26-jahkásaš Kárášjoga nieida Aili Kathrine Wergeland Teigmo lea oktii ovdal searvan SGP gilvvuide, diibmá. Son lea hárjánan artista ja su YouTube kanálas leat su lávlagat čuojahuvvon miljovnnaid gerddiid. Preassagovva: DRAGAN CUBRILO / MOTIONMOTIONMOTION
Mihka Helander & Andreas Gundersen – Ale guođe mu
Andreas Gundersen lei oassi SoÁ joavkkus mii diibmá vuosttaš geardde searvvai SGP lávlunoassái ja joavku bođii maid nubbin. 20-jahkásaš deatnulaš, Mihka, lea áhččeolmmoš ja oahpaheaddji. Lávlla, «Ale guođe mu», lea ráhkisvuođa ja moarsis birra. Preassagovva: DRAGAN CUBRILO / MOTIONMOTIONMOTION
17-jahkásaš Máret Áile Gaup Beaska lea dán jagi nuoramus oasseváldi. Son ii leat ieš vuos gullon nu viidát, muhto lea čuojahan doarjjakonseartta Fovsen-ášši oktavuođas. Son lea bajásšaddan luđiin ja musihkain ja lea Sara Marielle Gaup Beaska ja Beaska Niillasa nieida. Preassagovva: DRAGAN CUBRILO / MOTIONMOTIONMOTION
Linus Johnsen – Cevzoset hilat
19-jahkásaš Dielddanuori bárdni čuojaha piano ja oaččui 2018:s niehkostipeandda. Son studere dál musihka Romssas. Linus searvá SGP:i vuohččan. Preassagovva: DRAGAN CUBRILO / MOTIONMOTIONMOTION
Elin Oskal – Lusa
Sálaha nieida Elin Kristina Oskal ii leat ovdal searvan SGP:i, muhto su musihkka lea viidát gullon. Son lei 2021:s sámi BlimE-artista ja lávllui «Bávkkanas» lávlaga. Preassagovva: DRAGAN CUBRILO / MOTIONMOTIONMOTION
