Kim Hallgeir Berg – Anna Mathilde
Kim Hallgeir Berg, dahje Halgon, boahtá Kárášjogas. Son lea máŋgii oassálastán Sámi Grand Prixas, ja 2019:s vuittiige juoiganoasi John Heandaraga luđiin. Dán jagi searvá su ristnieidda, Anna Mathilde, luđiin man ieš lea bidjan.
Johan Anders Oskal – Vilba, Per Thomas
Johan Ánte Oskal boahtá Bearddus. Son lea debutánta iige leat ovdal oassálastán Sámi Grand Prixas. Luođi mainna oassálastá lea ieš bidjan iežas nubbinvilbeallái, Per Thomasii.
– Dát luohti bođii munnje nu go dábálaččat láve luohti boahtit, go ledjen ealloravddas. Ja leige Per Thomas guhte siđai mu searvat, ja nu mun dahken, bohkosa Johan Ánte ja joatká:
– Ferten vuiget ahte mus ii leat áibbas vuoitindovdu, go dieđán mun gilvalan olu čeahpes juigiiguin. In han mun leat ovdalaččas nu almmolaččat juoigan, mu mielas lea dušše somá searvat ja geahččalit dan maid.
Go ii leat ovdal oassálastán, de ii dieđe makkár vuordámušat leat. Son ii dieđe šaddá go searvat sáddagii mii galgá streamejuvvot.
– Mun ferten oaidnit makkár dilli guohtumis lea ovdal go mearridan sáhtán go sáddagii searvat, čilge ieš.
Domna Khomjuk – Parrša vigket
Domna boahtá Lujávrris, Ruošša bealde. Son oassálastá leu´ddain «Parrša vigket». Leu´dda lea árbevirolaš šuokŋa masa Domna ieš lea bidjan dajahusaid. Son oassálasttii vuosttaš geardde 2019:s joavkkus iežas oappáin, Anfisa Agejevain.
Jörgen Stenberg – Mathias Larsson
Jörgen Stenberg lea eret Máláges, Ruoŧa bealde. Son oassálasttii vuosttaš geardde 1995:s luđiin «Raekkerbákti» ja nuppes 2014:s, ja dalle vuittiige «Nejla» luđiin. Dán jagi oassálastá Mathias Larssona luđiin, man lea ieš bidjan.
Máhtte Ánte J. Sara – Karen Marianne
Guovdageaidnulaš Máhtte Ánte lea oktii ovdal searvan, 2017:s, Elle Sofe luđiin. Dán jagi juoigá eamida, Karen Marianne. Luođi eamidii lea ieš bidjan, ja illuda searvat dainna.
– Lea suohtas leat mielde, ja hui earenoamáš go oassálasttán eamida luđiin.
Son ii loga diehtit lea go vuoitodovdu, muhto su mielas lea gelddolaš searvat digitála lágideapmái.
– Ii šatta dieđusge nu somá go eai sáhte geahččit leat, muhto lea hui buorre go oba čađahuvvoge. Mu mielas leat gávdnan buori čovdosa, dán áiggi go sáhttá digitálalaččat lágiduvvot, muitala Máhtte Ánte.
Hanna-Maaria Kiprianoff – Mannu maainâs
Hanna-Maaria lea eret Čeavetjávrris, Suoma bealde. Son searvá dál nuppes SGP:i. Luođi lea ieš bidjan. Luohti lea giela massima ja máhcaheami birra, ja mo lea eallima lossa geainnuid vázzit.
Ellen Ravna A. Triumf – Maikela Lena
Ellen Rávná ássá Guovdageainnus. Dán jagi lea goalmmát geardde go oassálastá SGP:s. Son lea ovdal searvan sihke lávlun- ja juoiganoasis, muhto ii leat goassege vuoitán.
– Mun lean áigá álgán sihke lávlut ja juoigat, ja mun liikon dasa. Mun in láve searvat dušše vuoitima dihte, liikon juogadit iežan lávlagiid ja luđiid, muitala Ellen Rávná ja lasiha ahte son lea almmuhan lávlagiid ja luđiid Spotifyi ja Youtubii.
Dán jagi oassálastá iežas váhkarnieidda luđiin, Lena Kristine, man lea ieš bidjan.
Nils Johan Gaup – Niillas Elle Sara
Guovdageaidnulaš Nils Johan Gaup lea maid okta dán jagáš debutánttain. Son juoigá iežas oambealli, Ellen Sara Bals, dahje «Niillas Elle Sara», nu go luođi namma lea.
– Mu oambealli lei sávvan ahte sutnje bidjá luođi, nu mun dahken de ja luohti heive sutnje hui vuohkkasit. Dan juigen vuosttaš háve sutnje riegádanbeaivviskeaŋkan, mii lei oalle erenoamáš.
Son ii leat ovdal searvan, iige olus almmolaččat juoigan, muhto doaivu šaddá somá searvat digitála sáddagii.
– Mun juoiggan olbmuid dáfus ja livčče dieđusge hui somá hui livčče leamaš Báktehárjjis dievva hálla, nu movt láve dábálaččat. Muhto munnje, gii lean debutántta inge nu hárjánan almmolaččat juoigat, lea somá ná dušše studios searvat, bohkosa Nils Johan.
Nils Lars Nilsen Eira – Jon Andreas Rognerud Eira
Kárášjohkalaš Nils Lars Nilsen Eira lea oahpis SGP:s. Son lea searvan guktii ovdal, muhto ii leat goassege vuoitán. Dán jagi searvá luđiin man ieš lea bidjan iežas vilbeallái, Jon Andreas Rognerud Eirai.
– Go dát luohti bođii, de álgen jurddašit geasa galggan bidjat. Dát luohti lea dakkár jođánis olbmui heiven, ja nu leage dat olmmoš geasa lean bidjan luođi. Son lea jođán lihkadit ja maid lášmat ja luohti heive vuohkkasit sutnje, čilge Nils Lars.
Sutnje lea amas ja ođas digitálalaččat oassálastit, muhto sávvá ahte manná bures.
– Mun doaivvun mus leat seamma buorit vuoitovejolašvuođat go earáinge. Lea hirbmat buorre luohti iežan mielas, ja dainna gal soaittán beassat bajás, muitala son.
Nils Peder A. Gaup – Sara Risten Susanna
Iŋgor Ántte Nils Peder lea Guovdageainnus eret. Son golbmii ovdal oassálastán SGP juoiganoasis, muhto ii goassege vuoitán. Dán jagi searvá iežas nieidda luđiin, Sara Risten Susanna. Luođi lea ieš bidjan.
