-Almmuhus-
-Almmuhus-
KULTUVRASámi Grand Prix 2019 oasseváldit

Sámi Grand Prix 2019 oasseváldit

-

-

Oahpásnuva Sámi Grand Prixa oasseváldiide dás.

Juoiganoasi oasseváldit:

 


Preassagovva.

Hanna-Maari Kiprianoff

Hanna-Maari lea Čeavetjávrris eret, ja le’udd lea dan birra mot máttut ellet min luhtte vaikko máilbmi rievdá. 

Son searvá vuosttaš geardde Sámi Grand Prixii.

 

 

 

 


Vuorkágovva: Marit Elin Kemi

Kim Hallgeir Berg – «John Heandarat»

Vaikke lea ain nuorra, de Kim Hallgeir gal lea maid oalle veterána SGP dáfus.

Dál searvá čihččet geardde.

– Mun dat gal lean nubbi Jahn Teigen, reašká ieš.

Dán jagi juoigá ristbártnis, John Heandaraga, ja lohká luođi ilbman meahcis.

– Ledjen Šuorpmus reŋgomin ovtta badjeolbmo ja de vuojedettiin darvehin dien luođi, čilge son ja lohká luođi gal leat veahá ollesolbmo luohtin.

– Muhto jurddašan ahte gal son ge stuorru, čaibmá son.

Vaikke lea máŋgii searvan de ii leat goassege vuoitán.

– Mus lea juohke jagi vuoitindovdu, dál maid. Muhto dat lea duopmáriid ja olbmuid duohken mearridit.

Son lohká maid iežas leat veahá balus.

– Eanemus balus gal lean dainna jus luohti lea plagiáhtta, čilge son, guhte lea ge ieš vásihan plagieren-čuoččuhusaid ovdal.

– Dat gal lea veahá unohas, muhto dán rádjai lea lihkus mannan bures. Láven viggat gulaskuddat earáin gullá go dat luohti geasage ovdal go sádden SGP:i, čilge Kim Hallgeir.

 


Govven: Sámi Musihkkafestivála

Hans Ole Eira – «Laila Kristine» 

Dál lea viđát geardi go diimmá vuoiti Hans Ole Eira lávke SGP-lávdái. 

Dán jagi juoigá nieiddas, ja muitala iežas bidjan luođi guovtti niidii ovdalaččas, mat goappašagat leat gullon SGP-lávddis.

– Mus lea mihttu buot mánáide bidjat luođi ja SGP:i leage somá searvat go beassá ođđa luđiid almmuhit, muitala son.

Son ii loga iežas leat balus.

– In mun láve šat ballat, ja dán jagi beasan ge juoigat Báktehárjjis guhkesbearjadaga, ja de beasan veahá hárjehallat, čilge son.

Dán jagi oassálastá Hans Ole viellja Per Henrik maid SGP:s, ja dan lohká šaddat erenoamážin.

– Jáhkán su mihttu lea juobe mu bajábeallai ge beassat, nu ahte SGP gal šaddá fáddán giđđajohtimis, ja dat goabbá munnos lihkostuvvá buorebut dieđusge soaitá de juoiggadit eambbo, leaikkastallá Eira.

Son dattetge ii loga gilvvu nu duođalažžan ahte ii leat nevvodan stuoravieljas.

– Moai gal letne humadan dan birra ja lean nevvodan veahá, go mus lea eambbo lávdehárjáneapmi. Ii nu garra gilvu gal leat ahte vielja in veahket, čilge son.

 


Priváhta govva

Heli Aikio – «Lyemeákku»

Anáraš Piätárii Kaabi Isá Ooni Heli oasálastá livđiin man ieš lea bidjan. 

Son lea nubbi Suomabeale oasseváldi dán jagi juoiganoasis.

 

 

 


Priváhta govva

Anfisa Agejeva og Domna Khomjuk – «Vuess»

Zaharov-oappážagat Anfisa ja Domna Lujávrris eret leu`ddeba fárrolaga iežaska guovllu leu’dd Vuess masa leaba bidjan dajahusaid.

Anfisa Agejeva lávke dál njealját geardde SGP-lávdái.

Vuosttaš geardde searvvai 2001:s, dalle vuittii leu´ddiin man lei gohčodan «Meles».

 

 


Priváhta govva

Mathis A. Oskal – «Anna Christina»

Mathis A. Oskal gal lea albma SGP-veterána, ieš ii oba muittege man gallii leaš searvan, muhto árvvoštallá gal badjel 10 geardde leamašan SGP lávddis.

– Lea nu somá almmuhit ođđa luđiid, álggos vuos sáddet sisa ja de oaidnit beassá go mielde. SGP lea šaddan dego dávdan, čaibmá son go geahččala čilget mii dat lea SGP:s mii geasuha su searvat.

Vaikke leage máŋgii searvan de ii leat dássážii vuoitán, muhto dál gal lohká alddis leat doaivva vuoitit.

– Jua, mus lea vuoitindovdu dál, dan dat gal lea, dadjá son.

Son juoigá moarsis nieidda, Anna Christina, guhte lei riegádanbeaivveskeaŋkan sávvan luođi.

– Dát luohti lea hui nissonolbmo luohti, nieidaolbmo luohti, čilge son ja lohká nissonolbmuid luđiid leat eambbo femininan.

– Dain leat veahá fiidnát mohkit, eai leat nu fáhkka mohkit.

Go birrasiid logi geardde lea searvan, de ii galggašii jáhkkit ahte almmái lea šat balus, muhto dan son gal lohká leat.

– Lean dieđusge balus, iige oro áktánasat buorránan dat gal jagiid mielde. Muhto ii dat ábut balddihit iežas, dušše hárjehallat luođi, muitala ieš.

 


Priváhta govva

Mikkel Per Sara – «Tone»

Mikkel Per Sara searvá dál goalmmát geardde SGP juoiganoassái.

Dán jagi juoigá eamidis, Tone, guhte ii oba diehtán ge ahte son lei sádden luođi SGP:i.

– Lean hui balus, muhto go sáddejin dan sisa, de in jurddašan nu olu dan birra. Easka go bođii e-poasta ahte lean beassan mielde de gal časkkii bivastahkii. Eamit de jearralii mii dat munnje šattai, ja mun de muitalin ahte galggan su juoigat, čaibmá Mikkel Per.

Son muitala eamida šaddan movttegin go dan gulai, go lea guhká háliidan luođi. 

Sus dattetge eai leat nu olu vuordámušat gal gilvui.

– Lea hui somá go lean beassan mielde, muhto das ferte oaidnit mo manná, čilge son. 

Luođi birra muitala ahte ii leat nu jođán, muhto das leat veahá mohkit ja dajahusat. 

 


Govven: Sámi Musihkkafestivála

Nils Peder A. Gaup – «Elle Gárena luohti»

Iŋgor Ántte Nils Pedar Guovdageainnus eret,luohtedahkki ja dajahalli luođis.

Son lea guktii ovdal oassálastán SGP juoiganoasis, vuosttaš háve searvvai 2004:s, muhto ii leat goassege vuoitán.

 


Vuorkágovva: Berit Marie Lise EIra

Per Bueng – «Per Helge»

Per Bueng searvá dál guđát geardde SGP juoiganoassái, dássážii lea oktii vuoitán ja oktii gártan nubbin dán gilvvus.

Dán jagi juoigá ristbártnis Per Helge.

– Lean ristmánáide bidjan luđiid, šattan várra buot ristmánáide bidjat luđiid áiggi mielde. Dát luohti gal dušše bođii njálbmái, muitala ieš.

Son lohká dán leat fiinna luohtin mas eai leat nu olu mohkit.

– Lea dakkár masa heive musihkka ja mun almmuhan ge luođi maŋŋel beassážiid musihkain, muitala son.

Dán jagi ii jáhke gal iežas vuoitit, muhto sus lea ovddalgihtii jo favorihtta.

– Jáhkán ja sávan ahte Kim Hallgeir Berg vuoitá, son lea mielahis čeahpes juoigi, iige leat vuoitán ovdal, čilge son.

Iežas gal lohká eanas searvat somá dihtii.

– Lea somá ođđa luđiid almmuhit, lea šaddan beassášárbevierrun. In máhte čilget ge man somá lea SGP:i searvat, muhto sávašin ahte boahtteáiggis searvvašedje eambbo nuorat vai luohti ii jávkka, muitala Bueng ja lohká iežas hirbmadit jurddašit dan birra ahte nuorat galget juoigat fárus go ráhkada luđiid.

– Danne láven ge musihkkii maid heivehit luđiid, čilge son.

 


Priváhta govva

Per Henrik Eira – «Piera Joavnna»

Per Henrik Eira lea maid okta dán jagi SGP-debutánttain, go searvá dál vuosttaš geardde.

Son juoigá bártnis Piera Joavnna.

– Jurddašallen ahte mus lea áidna bárdni, ja de bođii luohti mii heivii sutnje, nu ahte de serven, muitala Per Henrik.

Son ii loga iežas goassege leamašan ná stuorra lávddis, nu ahte lea veahá balus.

– Balus gal dieđusge lean, leat nu olu čeahpes juoigit sihke gilvaleddjiid ja gehččiid gaskkas. Livččii olu geahppasat juoigat jus aivve dáččat leat guldaleamen, čaibmá son.

Sus lea viellja, Hans Ole Eira, maid mielde juoiganoasis, ja Hans Ole vuittii ge diibmá ja danne lohká ge leat veahá issorassan su vuostá gilvalit.

Vuoitima dáfus ii loga alddis nu olu jurdagiid.

– In dieđe dan vuoitindovddu go lean vuohččan searvamin, muhto lea somá go lean beassan mielde.

 

Lávlunoasi oasseváldit:

 


Govven: Terhi Tuovinen

Anna Lumikivi – «Mõõn tiõrvân»

Anna Lumikivi lea Avvilis eret ja lea olu bargan dološ le’uddiin, lávdde nalde leamaš, earret eará Suõmmkar joavkkuin.

Iežas dahkkon lávlagiin lea dál vuosttaš geardde mielde Sámi Grand Prixas. 

 


Preassagovva: Aslak A. Skum/Sámi Musihkkafestivála

Kalle Urheim – «Don beasat jođášit»

Kalle Urheim oassálastá dál nuppes SGP:s.

Son galgá ovdanbuktit lávlaga «Don beasat jođášit», man lohká muitalit máŋga muitalusa oktanaga.

– Muhto dainna mun muitalan mo bahá sáhttá jorgalit buorrin. Dat rievtti mielde gudnejahttá mu vielljarohki, guhte ražai psyhkalaš váttuiguin ja sorbmii iežas, čilge ieš.

Son lohká iežas leat giitevažžan go lea beassan mielde.

– Lean duđavaš dainna go lean beassan mielde, buot eará šaddá dušše bonus, vástida son go jerro leago vuoitin doaivva.

Ieš ii loga iežas leat balus gal vuos.

– In mun datte oru nu balus gal, muhto dieđán ahte ballagoađán juste ovdal go galggan lávket lávdái. Muhto jurddašan ahte nu guhká go váimmuin lávlu, de ii dárbbaš ballat, dadjá son vel loahpas.

 


Priváhta govva

Marina Grinchuk – «Vijde ja munn puerne»

Marina lea Lujávrris eret ja lávlu gildinsámegillii.

Lávlaga lea Alena Sidorenko čállán ja Igor Telishev lea dahkan šuoŋa.

Grinchuk searvá dál vuohččan SGP:i.

 


Priváhta govva

EiRA – «Eallin lea dál»

EiRA joavku boahtá Ráissas ja leaba oappážagat Anne I. Lilleng ja Marit E. Eira, geat rievtti mielde leaba Mázes eret.

Soai leaba goappašagat searvan SGP:i ovdal, muhto eaba fárrolaga joavkun nu mo dál.

Anne Inger lea maid oktii vuoitán.

Dál searvaba lávlagiin man Anne Inger lea čállán.

– Dát lea čállon movttiidahttin lávllan, muittuhussan ahte lea dehálaš eallit odne ja dál. Dát lea olbmuide geain soaitá leamašan lossat, muittuhussan ahte bohtet čuvges beaivvit fas ja ahte lea dehálaš riggodahttit eallima iluin, movttain ja buriin vásáhusaiguin, čilgeba soai.

Anne Inger muitala ahte čáledettiin lávlaga de dáhpáhuvai bearrašis juoga mii dagai lávlaga čiekŋaleabbon sudnuide.

– Min eadni oaččui borasdávdda, nu ahte dát lávlla lea sutnje. Muittuhussan ahte fertet váldit vára dan áiggis mii mis lea fárrolaga, čilge son.

Soai muitaleaba lávlaga leat movttegis lávllan, mas lohkaba leat veahá «partyfaktora».

Vaikke lea 23 jagi áigi maŋemus go soai leaba leamašan SGP:s de ii loga Anne Inger iežas leat balus.

– Mun ges gal dovdagohten dál veahá balu, dadjá Marit Elisabeth.

Soai eaba logai alddiska váldojurddan vuoitit.

– Sávve dieđusge vuoitit, muhto lea somá dušše searvat, boahtit Guovdageidnui ja leat mielde beassášdoaluin, dadjaba soai.

 


Govven: Camilla Egren

Saara Hermansson – «Mov laavlome»

Saara oasálasttii vuosttaš geardde diibmá ja dál lea máttasámi nieida Stornäs ja Klimpfjell guovllus eret, nuppes mielde lávlagiin man ieš lea dahkan.

 


Priváhta govva

Sunna Máret Utsi –  «Amas geaidnu»

Sunna lea Guovdageainnus eret ja searvá dál goalmmát geardde.

– Lea veahá váttis čilget lávlaga birra, go dalle go ledjen čállimin dan de lei váttis gávdnat sániid. Go de gergen dáinna, de orui muitaleamen menddo olu, nu ahte rievdadin dan vai sáhttá dulkojuvvot ráhkesvuođalávllan. Muhto dan sáhttá juohkehaš dulkot ieš mo háliida, čilge son. 

Son ii leat goassege vuoitán, iige loga alddis dál ge vuoitindovddu.

– Leat hui iešguđet lágan artisttat mielde dán jagi, mu boares oahpaheaddji Anne Inger Lilleng maid lea mielde, guhte lea hui čeahppi lávlut. Nu ahte leat olu čeahpes lávlut.

Maŋimus go lei mielde de lávllui hui persovnnalaš lávlaga, mas lei veagalváldin fáddán. 

Dán jagi lávlaga lohká leat movttegis lávllan.

– Lea álki čállit persovnnalaš lávlagiid. Muhto dál ii leat losses fáttá birra. Lea hui erenoamáš munnje čállit ja lávlut movttegis lávlagiid maid, dadjá son ja lohká iežas leat buoret dilis dál.

Son lohká iežas leat balus.

– Muhto šaddá hui somá, illudan hui olu ja šaddá miellagiddevaš gullat makkár lávlla šaddá,
dadjá son.

-Almmuhus-