-Almmuhus-
KULTUVRASámi girkoráđi ođđa jođiheaddji

Sámi girkoráđi ođđa jođiheaddji

-

-

Sara Ellen Anne Nilsdatter Eira lea odne válljejuvvon Sámi girkoráđi ođđa jođiheaddjin.

Sámi girkoráđi ođđa jođiheaddji válljejuvvui odne Girkočoahkkimis mii lágiduvvo Troandimis cuoŋománu 6.-12. beivviid, čállá NTB. Eira lea dovddus go lea bargan journalistan ja doaimmaheaddjin NRK Sámi, dál son bargá oahpaheaddjin Sámi joatkkaskuvllas ja boazodoalloskuvllas Guovdageainnus.

 

Áidna evttohas

40-jahkásaš guovdageaidnulaš nisu lei áidna evttohas jođiheaddjiámmáhii. Son illuda doaibmagoahtit ámmáhis.

– Lea stuorra ovddasvástádus čalmmustahttit sámi girkoeallima, ja dan mearkkašumi sámi guovlluide. Mun illudan ovddastit ja ovddidit sámi girkoeallima servodagas. Sámi girkoeallimis leat stuorra variašuvnnat, mii leat viiddis guovllus mas lea viiddis máŋggabealátvuohta ja buohkat fertejit oažžut buriid ovdánaneavttuid iežaset árbevieruide ja árvvuide, lohká Sara Ellen Anne Eira.

 

Eira lea áŋgiris girkomanni, ja lea gieskat válljejuvvon Guovdageainnu searvegotti oskuoahpahuslávdegoddái. Doppe son áŋgiruššá vai mánáin ja nuorain šattašii lunddolaš gullevašvuohta girkui. Astoáiggis áŋgiruššá son valáštallamis ja hálddaša sihke dáro- ja sámegiela.

-Almmuhus-