Sámediggeráđđi háliida ásahit duohtavuođa- ja soabadankommišuvnna internašunála modealla mielde. Sámi girkoráđi jođiheaddji Sara Ellen Anne Eira doarju dan. – Girku lea ovdal lohkan ahte mii háliidit searvat dan bargui, ja dan mii ain áigut, lohká Eira.
Sámediggeráđđi háliida ásahit duohtavuođa- ja soabadankommišuvnna internašunála modealla mielde. Sámi girkoráđi jođiheaddji Sara Ellen Anne Eira doarju dan. – Girku lea ovdal lohkan ahte mii háliidit searvat dan bargui, ja dan mii ain áigut, lohká Eira.
Sámi girkoráđi čoahkkimis Kárášjogas boahtte vahkku galget earret eará mearridit movt čuovvolit riikkaidgaskasaš álgoálbmogiid soabadankonferánssa, mii lei Troandimis geassemánu.
Sámi girkoráđđi lágidii konferánssa ovttas Girkuid máilmmiráđiin.
– Mihttun lei movttiidahttit, ráhkkanahttit ja gievrudit jođiheddjiid ja mielbargiid, vai servet rievdadanproseassaide. Rievdadanproseassaide mat galget dohkkehit álgoálbmogiid kultuvrraid ja gudnejahttit álgoálbmogiid universála rivttiid. Dat kapihtal ii leat lahka ge loahpahuvvan min riikkas. Soabadanbargu ádjána, lohká Eira.
– Eiseválddiid ovddasvástádus
Sámi girkoráđđi galgá dál árvvoštallat galgá go Norgga girku álggahit sierra guorahallankommišuvnna mii galgá geahččat makkár rolla Norgga girkus lei dáruiduhttimis. Ruoŧa girku lea aiddo almmuhan «vilgesgirjji».
Dat lea almmolaš guorahallan movt girku lea oassálastán vearredaguide ja loavkidemiide sámiid vuostá. Dat lea vuosttaš oassi Ruoŧa soabadanproseassas.
– Norgga girku lea guhká bargan soabadallamiin. Olu mearrádusat leat dahkkon mat čájehit ahte Norgga girku áigu rievdadit dili. Lea dehálaš ahte bargu ii bisán, muhto ain oažžu fuomášumi, lohká Sámi girkoráđi jođiheaddji.
Mearrádusevttohusas čállá Sámi girkoráđđi ahte háliidit resurssaid regiovnnalaš ja báikkálaš soabadanproseassaide, ja bivdet bismagotti vuoruhit dan bušeahtas.
Sara Ellen Anne Eira lohká ahte lea dehálaš ahte eiseválddit maid dovdet ovddasvástádusa soabadanbargguide.
– Dáruiduhttin lei našunála politihkka, mii váikkuhii fámuhis unnilogu álbmoga. Danne fertejit eiseválddit maid váldit ovttasvástádusa, lohká son.
Sámi nuoraidlávdegoddi
Sámi girkoráđi áššelisttus čuožžu maid ahte galget ásahit Sámi nuoraidlávdegotti. Ulbmil lea nannet nuoraid oassálastima sámi girkoeallimis.
– Nuoraidlávdegoddi lea sámi girkoeallima strategiijaplánas. Danne lea hui illudahtti ahte dál ásahuvvo, lohká Sara Ellen Anne Eira.
Sámi girkoráđis lea čoahkkin Kárášjogas juovlamánu 5. ja 6. beaivvi. ©NTB
