Odne ja ihttin čoahkkana Sámi girkoráđđi ráđđečoahkkimii.
Sámi girkoráđđi ja jođiheaddji Anne Dalheim leat ráđđečoahkkimis Girkonjárggas njukčamánu 10.-11. beaivái.
– Sámi girkoráđđái šaddá dehálaš ságastallat Sámedikki dieđáhusa birra sámiid riikkaidgaskasaš barggu dáfus, čállá Sámi girkoráđđi preassadieđáhusas.
Liturgiijabargu ja válga
Sámi girkoráđi čoahkkimis nammadit maiddái bargojoavkkuid davvisámi ja lullisámi liturgiijabargui. Dasa lassin nammadit sápmelaččaid Davvi-Hålogalándda ja Lulli-Hålogalándda boahttevaš bismagotteráđiválggaide. Ráđđečoahkkimis álggahit čielggadeami boahttevaš sámi girkolaš válgačoahkkima hárrái ja Norgga girku strategalaš dásseárvoplánii.
Bovdejit sálbmarohkosii
Árbevieru mielde lea Sámi girkoráđđái deaŧalaš deaivvadit báikkálaš searvegottiin. Odne eahkis diibmu 19.00 bovdejit sámi sálbmaruhkosii Girkonjárgga girkui, dás oasálastá Mátta-Várjjaga sámi sálbmalávlunjoavku. Maŋŋel ruhkosa lea girkokáffe ja dalle lea vejolaš háleštit Sámi girkoráđi olbmuiguin.
