-Almmuhus-
-Almmuhus-
-Almmuhus-
GUOIMMUHEAPMI– Sámi gilážat dárbbašit dakkáriid go Issát Ovllá

– Sámi gilážat dárbbašit dakkáriid go Issát Ovllá

-

-

Okta gii háliida leat čiegus rámideaddji lea evttohan sirbmálačča Issát Ovllá Varsi Ávvira juovlafuomášumi árgabeaisáŋgárin. 

– Nuorra, movttegis ja viššalis boanda Sirpmás. Sámi gilážat dárbbašit dakkáriid go Issát Ovllá, gii ealáskahttá báikegotti ja bissu doppe. Son veahkeha boares olbmuid ja kránnjáid, čállá son guhte lea evttohan Issát Ovllá. 

Movttet ja šiega

Anonyma evttoheaddji čállá viidásetahte  Issát Ovllá lea álo movttet ja šiega.

– Álo mojohallamin, ja doppe gos Issát Ovllá lea, doppe lea reaškkas ja mokta. Son lea čeahppi dánsut ja juoigat maid. Son lea ollu mu veahkehan ja movttiidahttán. Suinna sáhttá háleštit ja son berošta nuppi olbmos, čállá son.

Issát Ovllá Varsi lea nuorra Sirpmá boanda ja son lea maiddái Sirpmá Gilisearvvi stivrajođiheaddji, son lea dovddus gilážis leat veahkkás ja virkkos almmái geas leat buorit čovdosat.

Dan gal lea somá gullat

Issát Ovllá riŋgesta ruovttoluotta maŋŋá Ávvir lea ovdalis beaivvis viggan oažžut ságaide ja su mielas lei somá gullat maid dát anonyma olmmoš lea čállán su birra.

– Dan gal lea duođaid somá gullat, ahte olbmot liikojit go olmmoš lea lihkolaš . Dat han lea sámi vierru, go mis sápmelaččain lea hui buorre vierru ahte mii galgat veahkehit nubbi nuppi. Earát fas veahkehit min de, seamma láhkai veahkehit mu go mun veahkehan sin. Mis lea dakkár smávva árbevierru iige álo lea sáhka tinemis ruđa, muhto baicce veahkehit nuppi olbmo. Dat lea dakkár filosofiija mii mus lea, ja ieš oažžut veahki nuppes, dalle leat mus buorit olbmot iežan birrasis, mii lea mu mihttu eallimis. Lea mu riggodat ahte mus leat buorit olbmot  ja ustibat iežan birrasis, dadjá Issát Ovllá.

Lea go dan dihte go don leat maid nu movttet ja reaškkát dávjá?

– Dalle han easka šaddáge somá go veahkeha nuppi ja nu oaččun maid veahki go dárbbašan dan. Dalle šaddá maiddái automáhtalaš reaškkas ja buorre dilli. De šaddá buorre biras ja dalle maid lea somá eallit, dadjá son.

– Juovlasávaldat? 

– Mu juovlasávaldat leat buorit ja ráfálaš juovllat ja boahtteáigi, loahpaha Issát Ovllá Varsi.

 Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivčče juovlafuomášumi.

-Almmuhus-