-Almmuhus-
-Almmuhus-
OĐĐASATSámi gánda beassan riika­jovkui

Sámi gánda beassan riika­jovkui

-

-

 Jonathan Vonheim Norbye lea beassan mielde G15 spábbačiekčanriikajovkui.  

Cuoŋománu ovccát beaivvi almmuhii riikajoavkku 2007 ahkeluohká hárjeheaddji, Gunnar Halle, ahte lea válljen 15-jahkásaš gánddaid G15 riikajovkui. Okta sis lea sámegánda Jonathan Vonheim Norbye, gii ovddasta Alta IF (Áltá valáštallansearvvi). 

Su áhčči, Martin Vonheim Norbye, dadjá Ávvirii, ahte dat duođašta Jonathan lea bures hárjehallan ja dat movttiidahttá maid su áŋgiruššat velá eambbo.

– Mun jáhkán su viellja, Tobias, gii lea guokte jagi boarrásat ja dál mielde A-joavkkus, leamaš ávkin Jonathanii. Tobias lea ain buoret spábbačiekči go Jonathan, nu ahte ferten ain rahčat. Maiddái Hánsa-čeahci Alta IF A-joavkkus leamaš buorre  movttiideaddji Jonathanii. Hánsa lea easkka dál maŋit áiggi fárren Áltái, lohká Martin Vonheim Norbye. 

Bearaš vuoruheapmi

Martin Vonheim Norbye lea ge beakkán sámi čiekči,  Hans Norby, vielja.  Soai leaba bajásšaddan Kárášjogas ja sudno váhnemat, Doris Norbye ja Nils Peder Eriksen, leaba sudno movttiidahttán valáštallat. Martin jáhkká sii leat ožžon spábbačiekčanberoštumi Dorisis gii sihke časkkii spáppa gieđain ja čievččai spáppa. Son lohká ahte nu guhká go Jonathana mielas lea somá čiekčat spáppa, de lea dat juo iešalddis movttiideaddji. 

G15 addá vejolašvuođaid

Áhčči Martin Vonheim Norbye, gii ieš lea maid ovddes spábbačiekču, lohká beassat G15 riikajovkui addá Jonathanii vejolašvuođa ovdánahttit go beassá oaidnit makkár dássi lea Norggas ja Nuortariikkas. 

– Sii galget čiekčat vuos Nuortariikka ja Portugála vuostá 26.04. ja 27.04, ja de guokte čiekčama jus manná bures. Sáhttá gal sávvat ahte Jonathan beassá riikajoavkku spábbačiekčandássái, muhto lea vuos olu bargu ovdal go nu guhkás joavdá. Muhto G15 lea buorre álgu, lohká áhčči Martin Vonheim Norbye.

Lasiha velá ahte G15 gánddat galget Itáliai gos eanemus koronadávda lea, nu ahte sii lea ožžon dieđu váldit fárrui njálbmesujiid ja nu ain.

Erenoamáš vejolašvuohta nuorra spábbačiekčái

Alta IF valáštallanlávdegotti jođiheaddji Bernt Berg mielas lea hirbmat buorre Álttá valáštallansearvái go válljejit nu nuorra spábbačiekči G15 riikajovkui.

– Dat čájeha maid ahte lea vejolaš olahit alla dási spábbačiekčamis vaikko ná davvin ássá. Dat čájeha ahte min searvi bidjá návccaid ovddidit mánáid ja nuoraid attáldagaid. Várra leamaš ávki ahte mii leat bálkáhan nuorra hárjeheaddji, muhto maid ahte A-joavku, rekruhttajoavku ja G17 joavku leat čuovvolan juohke spábbačiekči bures vai ahtanuššá, lohká Bernt Berg.

Son čilge ahte valáštallanlávdegoddi bálkáha hárjeheddjiid, čikčiid, soahpá šiehtadusaid čikčiiguin ja eará spábbačiekčanservviiguin.

Norbye albmát

– Norbye gánddat han leat bajásšaddan spábbačiekčamiin. In leat in veháš ge hirpmahuvvan go Jonathan lea čeahppi. Alta IF:i čájeha dát válljen ahte spábbačiekčit, geat ásset davvin, sáhttet maiddái lihkostuvvat ja beassat iešguđet ahkásaš riikajovkui. Lea hirbmat buorre, joatká Bernt Berg. 

Son muitala sis lea buorre ovttasbargošiehtadus TIL:in Romssa valáštallansearvi) ja Bodø/Glimt spábbačiekčanservviin ja ahte sin spábbačiekčit fitnet doppe dávjá spáppa čiekčamin.

– Min spábbačiekčit čikčet maid nationálaráiddus. Nuppi beassášbeaivvi lea spábbačiekčangilvu gaskal Alta IF ja TUIL ( Sálašvákki valášstallansearvi) Finnmarkshallenis, lohká Bernt Berg loahpas.

Lihkkosávaldagat

Jonathan Vonheim Norbye. Govva: Alta IF
Jonathan Vonheim Norbye. Govva: Alta IF

 G15 riikajoavku čoahkanit vuosttaš spábbačiekčamiidda Torneo Delle Nazioni Itálias ja Nuortariikkas cuoŋománu 22. beaivvis gitta miessemánu 2. beaivái. Norgga G15 riikajoavku lea mielde D-joavkkus ja galget čiekčat Nuortariikka ja Portugala vuostá.

-Almmuhus-