-Almmuhus-
SMÁVVAOĐĐASATSámi fámui­duhttin seminára 

Sámi fámui­duhttin seminára 

-

-

Sámiráđđi lágida seminára mas ulbmilin lea hukset oktasaš áddejumi das maid Sámi fámuiduhttin gáibida.

Sámiid 22. konferánsa lágiduvvo Jielleváris, borgemánu 10. beaivvi gitta 14. beaivái 2022:s, ja dan oktavuođas lágiduvvo seminára mas lea fáddán  dán jagi Fámuiduhttit Sámi. 

Duogáš doabas «fámuiduhttin», dahje «empowerment» eŋgelasgillii, čujuha doaimmaide, main lea ulbmil lasihit ovttaskas olbmuide, álbmogiid ja servošiid iešstivrejumi ja iešmearridanrievtti. Vai sii nákcejit ovddastit ovdduideaset vásttolaččat ja dainna vugiin maid sii leat ieža mearridan, čállá Sámiráđđi sin neahttasiiddus. 

– Lea proseassa, mas olmmoš šaddá nannosabbon ja oažžu stuorát jáhku alcces, erenoamážit iežas eallima hálddašeamis ja vuoigatvuođaid gáibideamis. Fámuiduhttin proseassa čujuha sihke iežas nannemii, ja maiddái dasa mo earát diđolaččat ja ámmátlaččat sáhttet dán proseassa doarjut. Fámuiduhttima bokte sáhttá nákcet guođđit fámuhisvuođadovddu ja dovddu ahte ii bastte váikkuhit áššiide. Dan sadjái oahppá fuobmát iežas návccaid ja vejolašvuođaid. Sámi fámuiduhttin lea viiddis fáddá, mii fátmmasta máŋggaid osiid min servodatovdáneamis. Das lea sáhka ealli gielain, eananvuoigatvuođain, nana ásahusain, buriin eallineavttuin, mánáin ja nuorain geat leat rámis iežaset duogážis ja identitehtas, ovttasbarggus riikkarájáid rastá, virkos kultureallimis, dutkamis ja oahpahusas mii lea heivehuvvon min dárbbuide, ja buhtes luonddus, čállet sámiráđđi.

Gažaldagaid maid áigot digaštallat lea: Mii dárbbašuvvo, jus háliidit fámuiduhttit Sámi? Mii lea min iežamet ovddasvástádus, ja mii lea earáid duohken?

Buoret áddejupmi mii gáibiduvvo fámuiduhttit Sámi

Ulbmil seminarain lea hukset oktasaš áddejumi das maid Sámi fámuiduhttin gáibida.

– Seminára figgá hábmet buoremus ovdamearkkaid ja doaimmaid fámuiduhttin dihte Sámi, ja seammás vástidit daid hástalusaide mat mis ain leat. Seminára maŋŋá sávvat ahte oasseváldiin lea eanet máhttu iešguđet doaimmain, mat leat jođus miehtá Sámi ja láidestit fámuiduhttit min servodaga. Mii sávvat maid, ahte oasseváldiin lea buoret áddejupmi das, mii gáibiduvvo fámuiduhttin dihte Sámi ain eanet, ja ahte sii leat diđolaččat sihke daid vejolašvuođain ja hástalusain, mat Sámis odne leat, čállá sámiráđđi.

-Almmuhus-