-Almmuhus-
Featured box1 «Sámi eatnan duoddariid» evttohit sámi našunála­luohtin 

«Sámi eatnan duoddariid» evttohit sámi našunála­luohtin 

-

-

Sámi Parlamentáralaš Ráđi sámekonferánsa  Tråantes 2017:s bivddii  symbolalávdegotti gávdnat vuogas luođi mii heivešii sámi našunálaluohtin. 

Sámi Parlamentáralaš Ráđi (SPR) symbolalávdegotti jođiheaddji Anders Kråik, 2017-2019 áigodagas, muitala SPR bivddii sin evttohit vuogas luođi maid sápmelaččat Norggas, Ruoŧas, Suomas ja Ruoššas sáhttet soahpat nationála luohtin. 

– Mis ledje olu buorit luohteevttohusat. Mii digaštalaimet olu, maiddái almmuhit go dan luohtegilvun. Muhto de  muhtin evttohii Áillohačča luođi «Sámi eatnan duoddariid», masa buohkat sohpe. Lea dehálaš ahte buohkat leat ovttaoaivilis. Sávan SPR dohkkehit dan evttohusa ja ahte lea duođalaš evttohas, jus eat oaččo eará luohteevttohusa. 

SÁMI SYMBOLAT DEHÁLAČČAT ÁLBMOGII: Sámi Parlamentáralaš Ráđi symbolalávdegotti jođiheaddji Anders Kråik, lohká sámi álbmogii, mii ássá njealji rikkas, lea erenoamáš dehálaš ahte leat oktasaš symbolat mat čohkkejit álbmoga. Vuorkágovva: Astrid Helander
SÁMI SYMBOLAT DEHÁLAČČAT ÁLBMOGII: Sámi Parlamentáralaš Ráđi symbolalávdegotti jođiheaddji Anders Kråik, lohká sámi álbmogii, mii ássá njealji rikkas, lea erenoamáš dehálaš ahte leat oktasaš symbolat mat čohkkejit álbmoga. Vuorkágovva: Astrid Helander

Sámi symbolat dehálaččat sámiide

Anders Kråik lohká su mielas leat sámi oktasaš symbolat dehálaččat sámi álbmogii Sámis, go riikkaráját juhket sápmelaččaid njealji iešguđet riikii. 

– Sámi oktasaš symbolat, nu go álbmotbeaivi, leavga ja lávlla, leat symbolat mat čohkkejit álbmoga ja addet oktasaš identitehtadovddu. Mis leat sámi skuvllat, iešguđet ásahusas maidda livččii dat hirbmat dehálaš. Luohti han lea vuođđooassi sámi kultuvrras eambbo go lávlla. 

Lávdegotti ákkastallan

Nils-Aslak Valkeapää / Áillohaš ráhkadii dajahusaid ja šuoŋa «Sámiid eatnan duoddariid» ja almmuhii dan iežas skearrus 1978:s. Symbolalávdegoddi evttoha ahte luođi dajahusat galget leat dat seamma maid Áillohaš čálii 1996:s ja mii almmuhuvvui su girjjis «Girddán seivvodan» 1999:s. 

– Sámi nationála luođi galgá sáhttit juoigat dajahusaid haga, dušše oasáža su dajahusain dahje olles dajahusaid, čilge Anders Kråik.

Lávdegoddi čilge ahte dat luohti lea šaddan oktasaš sámi symbolan ja juigojuvvo sámi oktavuođain nu go skuvllain, almmolaš dilálašvuođain ja gos sápmelaččat čoagganit. Nils-Aslak Valkeapää / Áillohačča luođis gullo olles Sámi luohteárbevierru ja dasa sohpet sihke vuolie, vuolle, luohti, levde ja leu ´dd. Luohti muitala sápmelaččaid ráhkesvuođa iežaset guvlui litna jienain. 

Ovttaoaivilvuohta

Juoigalasaid searvvi jođiheaddji Nils Johan A. Gaup lohká su mielas heive dat luohti hui vuohkkasit.

– Duottar han lea miehtá Sámi. Lea maid gullon olu ovdal. Lea okta dain buoremus luđiin maid sáhttá bidjat sámi nationála luohtin. Go gulat dajahusaid, de heive miehtá Sámi, lohká Nils Johan A. Gaup.

Juoigiid Searvvi jođiheaddji Kirsten Marit Olsena mielas lea maid vuogas evttohus. 

– Fátmmasta olles Sámi ja buot sápmelaččaid. Lea hui olu luonddu ja sámiid birra, lohká Kirsten Marit Olsen.

- Advertisement -
-Almmuhus-