Sámi Dáiddaguovddáš (SDG) direktevra Hjørdis Kurås lea heaitán beaivvát ala mannan vahkus. Son dadjá máŋga siva manin háliidii heaitit, earret eará go SDG stivrras eai čáhkke saji nuorat dáiddáriidda.
Sámi Dáiddaguovddáš (SDG) direktevra Hjørdis Kurås lea heaitán beaivvát ala mannan vahkus. Son dadjá máŋga siva manin háliidii heaitit, earret eará go SDG stivrras eai čáhkke saji nuorat dáiddáriidda.
Sámi Dáiddaguovddáš (SDG) Kárášjogas bázii direktevrra haga mannan vahkus go direktevra ja govvadáiddár Hjørdis Kurås heittii.
Sihke Kurås ja SDG stivra muitalit sii leat soahpan son heaitá, muhto manin dan dahká, dat ii leat čielggas. Heaitán direktevra Hjørdis Kurås aŋkke geažuha veahá mii lea sivva go heaitá:
– Leat máŋga siva manin háliidin heaitit, earret eará ahte SDG stivrras čohkkájit dušše boares dáiddárat geat eai čáhkke saji nuorat dáiddáriidda, leat vuovdnái ja ráhpot alcceseaset buot buriid. Eai sii ádde ahte nuorat sámi dáiddárat háliidit árvvoštallot dálááiggi ámmátdáiddárin, eaige imašlaš olmmožin, dadjá Hjørdis Kurås.
Eai kommentere
SDG stivrra bealis eai hálit kommenteret maid leat šiehttan Kuråsain, eai ge maid hálit dadjat maide moaitagiidda maid Kurås dadjá, ahte stivrra ii čáhkket saji nuoraide.
SDG stivrajođiheaddji Bente Geving duođašta dušše ahte stivra soabai mannan vahkus Hjørdis Kuråsain ahte son heaitá barggustis SDG:s Kárášjogas.
Ii ge stivralahttu Inger Blix ge hálit maide dadjat:
– SDG stivra lea soahpan Kuråsain heaitinšiehtadusa ja eambbo mun in sáhte jienádit, lohká SDG stivralahttu Inger Blix Kvammen.
Guokte jagi direktevran
SDG vuođđudusa stivra nammadii govvadáiddára Hjørdis Kuråsa direktevran guokte jagi dás ovdalis. Son bargagođii direktevran miessemánu 2014:s ja geassemánu 14. beaivvi 2014:s fárrii SDG «ođđa» vissui guovdu márkana.
Dán áigodagas leamaš olu riedja man birra media lea čállán. Dát guoská direktevrra ja bargiid ovttasbargui, ahte bargit leat heaitán SDG:s, ahte olbmot leat moaitán Kurås beatnaga ja ahte sámi dáiddárat leat nimmordan.
Ii ieš ge Hjørdis Kurås áiggo duođi eambbo dadjat heaitima hárrái ja ovddeš konflivttaide mat leat beaggán su ámmáha olis.
– Mun lean soahpan SDG stivrrain ahte beasan heaitit iežan bargodilis SDG:s. Mu bargošiehtadus nohká čakčamánu maŋemus beaivvi dán jagi, lohká SDG heaitán direktevra Hjørdis Kurås gii ieš maid lea sámi govvadáiddár.
Dárbu ođđa bargovuogádahkii
Dál doaibmá SDG stivrajođiheaddji Bente Geving beaivválaš jođiheaddjin dassážii go stivra nammada ođđa olbmo.
– Mii leat dál stivrras bargamin ođđa bargovuogádagain, áigut ođđa olbmuid virgádit. Lea čielggas ahte buohkat, geat virgáduvvojit, galget vuoruhit sámevuođa ja ovddidit sámi dáidaga go SDG lea áidna sámi dáiddaguovddáš máilmmis. SDG galgá dasa lassin čájehit eamiálbmogiid ja davviguovlluid dáidagiid. Jáhkán čavččabeallái, jus eat árabut, de almmuhat virggi rabasin, lohká SDG stivrajođiheaddji Bente Geving.
Čuoččuhusat
Sámi designer Anne Berit Anti ii loga iežas gal vásihan dan maid Kurås čuoččuha, ahte SDG stivra ii vuorut nuorat dáiddáriid.
– Ii leat duohta ahte ii leat sadji nuoraide. Diet leat su čuoččuhusat. Mun in leat vásihan dan maid Kurås čuoččuha, baicce lean ožžon máilmmi buori veahki ja nana oahpu dáiddáriin geat leamaš miellahttun álggu rájes. Mun leamašan Sámi Dáiddačehpiid Searvvi jođiheaddji ja dál lean Sámi Dáiddaráđi jođiheaddji. Mun sávan lihku Kuråsii viidásut mátkái. Leamaš olu riidu SDG:s ja sávan SDG gávnnašii buori jođiheaddji gii buktá ráfi, lohká 42-jahkásaš dáiddár Anne Berit Anti, gii maid lea dovddus Abanti namain.
