Leat veahkehan ja bargan organisašuvnna vuođuin, ja leat bidjan olu áiggi ja návccaid organisašuvdnabargui.
Dan jagi go organisašuvdna Sámi Dáiddačehpiid Searvvis (SDS) lei 40-jagi ávvudeapmi, de gudnejahtte seammás golbma miellahtu gudnemiellahttuvuođain.
Synnøve Persen lei mielde ávdneme organisašuvnna 1979:s, ja son, Ingunn Utsi ja Annelise Josefsen ožžo ge gudnemiellahttuvuođa SDS jahkečoahkkimis ávvujagis.
Oskkáldas veahkit
Persen, Utsi ja Josefsen leat veahkehan ja bargan organisašuvnna vuođuin, ja leat bidjan olu áiggi ja návccaid SDS organisašuvdnabargui máŋga jagi.
– Buot golmmas leat bargan oskkáldasat sihke stivrajođiheaddjin, stivramiellahttun dahje eará stivrraid ja ráđiin, prošeavttain, ekonomiijain ja ovttasbargan eará organisašuvnnaiguin, čállá searvi preassadieđáhusas.
Dát leat buot golmmas leamaš mielde fievrrideame ovdáneami organisašuvnnas doppe gos dál lea.
Ollašuhttán ideaid
Okta dain bargogáibideaddji prošeavttain maid sáhttá váldit ovdamearkan, lea Kárášjoga dáiddaskuvla, masa sihke Synnøve Persen, Ingunn Utsi ja Annelise Josefsen leat geavahan olu iežaset resurssain oažžun dihte ovtta SDS máŋgga ideain ollašuvvat.
Garra dáiddalaš iešvuohta
Seammás go dát golbma dáiddára leat geavahan olu áiggi organisašuvdnabargui, de leat orron maid visuála dáiddárat.
Buot golbmasis leat garra dáiddalaš iešvuođat, ja leat dávjá aktiivvat ja áigeguovdilat sámi, nationála ja internationála dáiddalávddis.
– SDS lea čeavlái go dát golbma dáiddára leat sis miellahtut organisašuvnnas, ja movttegat go ođđa buolvvain leat dát dáiddárat ovdagovvan.
