-Almmuhus-
KULTUVRA Sámi dáidda bivnnut olgoriikkas: – Mis lea juoga fállat máilbmái

Sámi dáidda bivnnut olgoriikkas: – Mis lea juoga fállat máilbmái

-

-

Venezia dáiddabiennála oktavuođas almmuhii ­Norgga riikkaidgaskasaš dáiddagaskkustanlihttu OCA boahtteáigásaš dáiddaovttasbargguid. ­Máŋggas dain fátmmastit maid sámi ja álgoálbmot diehtaga ja dáidaga.

Sámediggepresideanta Aili Keskitalo oahppalattai ge Venezia dáidda­biennála gieskat, ja searvvai čájáhusa A Greater Miracle of Perception rahpamii Alvar Aalto-­paviljongas, mas earret eará sámi dáiddárat Suvi West ja Outi Pieski leigga mielde, oassin Miracle ­Workers -dáiddakollektiivvas.

– Mis lea juoga fállat máilbmái, sámi dáiddárat geat áidnalunddot jienaiguin gaskkustit eará duohtavuođaperspektiivvaid. Máilbmi dárbbaša sámi dáidaga, dadjá sámediggepresideanta.

 

Čalmmustahttit jieŋa muitalusaid

– Guovddášovttasbargi šaddá Toronto dáiddabiennála, mas álgoálbmotkuráhtor Candice Hopkins ovttasbargá OCA:in Susan Schuppli prošeavttain «Learning from Ice» – oahppat jieŋas. Ulbmilin lea čalmmustahttit jieŋa muitalusaid dálkkádatrievdama oktavuođas ja maiddái vuoigat­vuođa bissut galmmasin. Pro­šeakta fátmmasta maid sámi ­diehtaga ja dáidaga. Dát ovttasbargu lea áigodagas 2020-2021, čállá Norgga Sámediggi preassadieđáhusas.


Ruoŧa Sámedikki presideanta Per-Olof Nutti, Suoma Sámedikki presideanta Tiina Sanila-Aikio, IsumaTV kollektivva filbma­dahkki Uyarak Tulugarjuk, álgoálbmotkuráhtor Candice Hopkins, Norgga Sámedikki presideanta Aili Keskitalo ja sámediggeráđđi Henrik Olsen. 
Govven: Silja Somby/Sámediggi.

 

Ovdanbuktit dáidaga gaskkustanfámu

– «Dáidda ja vuostálasvuohta» leat dáiddadiŋgojumit áigodagas 2020-2023, ovttasbarggus KORO:in – Norgga almmolaš­vuođa dáiddalihtuin. Vuolggasadji lea Duohtavuođa- ja seanadankommišuvnna bargu ja kolonialismma váikkuhusaid čalmmus­tahttin sihke ovddeš ja dálá áiggis. Ovttasbargu maid galgá buktit ovdan dáidaga dehálaš gaskkustanfámu iešguđege gažaldagaide, čuolmmaide ja vuostálašvuođaide maid duohtavuođa- ja seanadankommišuvdna boahtá ovdanbuktit servodahkii. KORO lea dehálaš ovttasbargoguoibmi dan olis go sii maid leat vuođđuduvvon vuostálasvuođaid boađusin 70-logus, čállá Sámediggi.

 

Sápmi Brasilas

Sámediggi čilge ahte «Sápmi ­Brasilas» lea oassin São Paulo dáiddamusea prográmmas Brasilas, mii bidjá álgoálbmot dáidaga guovddážii 2021:s.

OCA áigu ohcalit ovttasbarggu sámi kuráhtoriiguin ja KODE dáiddamuseain Bergenis. Prográmmas Sao Paulos, Brasilas galget leat earret eará konferánssat, almmuheamit, čájáhusat ja bargobájit.

- Advertisement -
-Almmuhus-