-Almmuhus-
-Almmuhus-
OĐĐASAT Sámi dáidagii sadji oaivegávpogis

Sámi dáidagii sadji oaivegávpogis

-

-

RiddoDuottarMuseat ja Oslo Sámi Viessu leat vuolláičállán golmma jagi šiehtadusa, mainna áigot loktet sámi dáidaga Oslos.

RiddoDuottarMuseat (RDM) leat dál ožžon čájáhusbáikki oaivegávpogii, go leat ráhkadan šiehtadusa Oslo Sámi Viesuin.

– Go dáidda oažžu báikki Osloi, de leat mii mielde realisereme sámi dáiddamusea. Mii čalmmustahttit sámi dáidaga našunála dáidda- ja kulturguovddážis, mii Oslo lea, čállá RDM preassadieđáhusas.

 

Rahpamis dáiddačájáhus

Dáidda man RDM čájeha Oslo Sámi Viesus lea vuosttažettiin sámi dáidda, muhto leat maid čanastagat eará árktalaš álgoálbmogiidda. Dáiddárat leat Synnøve Persen, Britta Marakatt-Labba, Hans Ragnar Mathisen ja Iver Jåks.

Oslo Sámi Viessu lea ge aitto ožžon ođđa vistti. Vuosttaš dáiddačájáhus lea dán mánu 21. beaivvi, ođđa vistti rahpamis.

Rahpamii vurdet olu olbmuid, ja leat bovden sámedikkepresideantta, Oslo sátnejođiheaddji, Kulturráđi ja departemeantta.

– Ovttasbargu RiddoDuottarMuseain addá midjiide vejolašvuođa čájehit sámi dáidaga sihke skuvlaklássaide ja kulturráđđái, čállá Oslo Sámi Viessu preassadieđáhusas.

 

Nannet kultuvrra dáidagiin

– Ovttasbargguin eará institušuvnnaiguin čájehit sámiid johtindábiid, mii sáhttit johtit ja seammás eat masse iežamet gullevašvuođa ja duogáža. Sámi identitehta lea lihka dehálaš gávpogiin go eará báikkiin. Lagasvuohta árbevieruide, gillii ja sámi árvvuide sáhttá nannejuvvot dáidaga bokte. Mii oaidnit ahte lea dehálaš ahte leat Romssas ja Oslos, čállá RDM preassadieđáhusas.

- Advertisement -
-Almmuhus-