-Almmuhus-
-Almmuhus-
OĐĐASATSámi Club Night lea dál ieš­heanalaš organisa­šuvdna

Sámi Club Night lea dál ieš­heanalaš organisa­šuvdna

-

-

Ođđa stivra pláne lágidemiid boahtte čakčii.

IDJA – Sámi Club Night lea ovdalaččas leamaš konseapta Oslo guovllu nuoraidorganisašuvnnas, Oslove Noereh. Mannan duorastaga lei ásahančoahkkin ja Sámi Club Night lea dál iešheanalaš organisašuvdna.

– Lean hirbmat ilus ja rámis go viimmat leat ásahan IDJA – Sámi Club Night sierra organisašuvdnan. Dál sáhttit lágidit konsearttaid miehtá riikka, dadjá ođđa stivrrajođiheaddji Erle Bårdsdatter Sæther Ávvirii.

OĐĐA STIVRA: Erle Bårdsdatter Sæther lea válljejuvvon stivrajođiheaddjin. Govas lea Sæther IDJA – Sámi Club Night lágideamis jagis 2017. Priváhta govva.
OĐĐA STIVRA: Erle Bårdsdatter Sæther lea válljejuvvon stivrajođiheaddjin. Govas lea Sæther IDJA – Sámi Club Night lágideamis jagis 2017. Priváhta govva.

Ođđa stivra

Erle Bårdsdatter Sæther lea ođđa stivrajođiheaddji. Son lea ovdalaččas lágidan IDJA – Sámi Club Night Oslove Noereh báikkálaš searvvi ovddas. Ánde Trosten lea nubbijođiheaddji ja Per Anton Øverseth Olsen, Jouvnas Helmine Bruun Arnesen, Linus Johnsen, Odne Alexander Mathiassen ja Elen Krogh Ravna leat stivrralahtut. Therese Olsen ja Daniel Steinfjell leaba válljejuvvon várrelahttun. 

– Lean hui ilus go dát joavku lea válljejuvvon stivrii ja mun illudan lágidit singuin konsearttaid. Jáhkán leat oallugat geat háliidivčče ovttasbargat minguin ja mii sávvat sii váldet minguin oktavuođa! dadjá Erle Bårdsdatter Sæther.

Plánejit konsearttaid čakčii

Son maid muitala ahte organisašuvdna joatká ovttasbargguin Riikkalávddiin Oslos, muhto eai vuos almmut vuosttaš plánejuvvon konseartta.

– Mun jáhkán oallugat leat hui mielas buori konseartavásáhusaide dál maŋŋel guhkes pandemiija ja mus lea stuorra jáhkku ahte IDJA – Sámi Club Night sáhttá dan buktit. Lea hui gelddolaš mii boahtteáiggis boahtá, muhto mun dieđán IDJA lea leamaš ja ain lea dehálaš sámi kultureallimii, dadjá stivrrajođiheaddji.

– Ođđa stivra illuda álgit bargguin ja hukset organisašuvnna. Stivra galgá earret eará plánet čakčii lágidemiid ja ásahit buriid ehtalaš njuolggadusaid ja dieđihanvieruid, cealká ođđa stivra preassadieđáhusas.

-Almmuhus-