Suoma beale lágidedje 60 sámi badjeolbmo sierra deaivvadeami mannan vahkoloahpas Anáris gos leat digaštallan iežaset boahtteáiggi.
Boazodoallu Suomas ii leat organiserejuvvon seamma ládje go Norggas. Suomas sáhttá suopmelaš bargat bohccuiguin. Bálgosiid ovttastus ja dasa gullevaš boazoparlameanta leat dat sadji gos sihke sámi ja láddelaš badjeolbmot deaivvadit. Mannan geasi ledje boazoparlameanttas válggat mas galge válljet parlameantajođiheaddji. Sámi badjeolbmuid evttohas vuoitahallai, muhto dainna bohtosiin eai lean sámi badjeolbmot ovttaoaivilis.
Dát lei ágga dasa go sámi badjeolbmot leat deaivvadan sierra mannan vahkoloahpas Anáris ja háliidan humadit sámi boazodoalu ovddideami birra.
– Dat čájeha ahte sámeboazodoallu lea hui ealli ja dehálaš oassi sámekultuvrras. Dakkár sáhkavuorut ledje deaivvadeamis, ahte mii háliidit ovttas bargat sámi boazodoalu ovddas, dadjá Tiina Sanila-Aikio Yle Sápmái.
Deaivvadeamis eai leat mearridan loahpalaččat háliidit go vuođđudit sierra searvvi mii ovddidivččii sámi boazodoalu Suoma beale.
Sámi bálgosiid njunuš Tiina Sanila-Aikio lohká Yle Sápmái ahte boahtte sullasaš deaivvadeami plánejit doallat boahtte geasi.
