-Almmuhus-
OĐĐASATSámi beassášfestivála šluhttejuvvo

Sámi beassášfestivála šluhttejuvvo

-

-

Guovdageainnu beassášfestivála šluhttejuvvo. Dan lea Guovdageainnu váldodoavttir ja Beassášfestivála ovttasráđiid mearridan.

Guovdageainnu beassášfestivála čállá iežaset neahttasiidduin ahte Álbmotdearvvašvuođainstituhta ávžžuhus šluhttet stuora doaluid ja go Kárášjogas lea fuomášuvvon Coronavirus (Covid-19), dagahii ahte Guovdageainnu váldodoavttir mearridii ahte buot stuora lágideamit Guovdageainnus galget šluhttejuvvot. Dat mielddisbuktá ahte Sámi beassášfestivála lágideamit cuoŋománu 08. b. – 12. b. 2020 eai čadahuvo, čállet iežaset neahttasiidduin.

– Mis lea ovddasvástádus

– Festiválas lea ovddasvástádus leat mielde eastadeame coronavirusa leavvama, ja dieđušge mii váldit vuhtii dan maid našunála ja báikkálaš dearvvašvuođaeiseválddit rávvejit. Eai artistat, guossit, eaktodáholaččat, bargit, iige oktage eará galgga dárbbašit buohccát Sámi beassášfestivála lágidemiid geažil, čállá festiválajođiheaddji Ken Are Bongo.

Buohkat ožžon dieđu

Artistat ja bargit leat ožžon dieđu mearrádusa birra odne, dakka maŋŋel go mearrádus dahkkui. Šluhttenmearrádus váikkuha maiddái sidjiide geat vuvdet bálvalusaid festiválii ja diehtu sidjiide maid sáddejuvvo dađistaga, ja nu jođanit go vejolaš.

– Mii áigut árvvoštallat lea go vejolaš lágidit Sámi Grand Prix 2020 eará áigodagas dán jagi, ja dieđihit eanet dan birra nu jođanit go diehtit movt dainna šadda.

Festivála dáhttu giitit gili álbmoga, eaktodáhtolaččaid geat ledje gergosat bargat, buot eará bargiid, ovttasbargoguimmiid ja gussiid ipmárdusa ovddas.

Festvála jođiheaddji lohká bileahtaid ovddas máksojuvvo ruovttoluotta seamma sajes gos lea oston. Lea dušše servicedivvat mii ii máksojuvvo ruovttoluotta.

-Almmuhus-