-Almmuhus-
-Almmuhus-
VALÁŠTALLANSámi bárdni vuittii KaraX

Sámi bárdni vuittii KaraX

-

-

Petter Nårsa čájehii movt skuterin galgá vuodjit go vuittii KaraX rievvár­vuodjima juste nu go ieš háliidii.

Kárášjoga mohtorsearvi (KMK) lágidii KaraX skutercross gilvvuid beassášlávvordaga nu go lávejit. Ja nu go maid lávejit, de ledje čoahkkanan birrasiid 1000 geahčči geat oidne go Petter Nårsa vuittii rievvárvuodjima ja faskii mielde 35.000 ruvnno vuoitun. 

Sihke lágiideaddjit ja Nårsa ledje duhtavaččat doaluiguin, gehččiiguin ja vuodjinšiljuin. 

– Dáppe lea dat stuorimus álbmot feasta go lea sáhka beassážiid skutercross gilvvuin. Guovdageainnus geahččaledje, muhto mii oaidnit vuohon ahte dáppe dat lea dat álbmotfeasta, mojohallá KMK-jođiheaddji May Helen A. Rasmus.

 

Sámi bárdni vuittii

Petter Nårsa lea eret Moskoselas, Árviesjávrrie suohkanis Ruoŧas. Son lea sápmelaš ja son lea beaivválaččat skutercross násti Amerihkás. Vuodjimat leat nohkan doppe ja son lea leamaš birrasiid mánu ruovttus. 

– Vuosttažettiin de lei earenoamáš somá boahtit ruovttoluotta Kárášjohkii. Mun ledjen dáppe 2007:s go ledjen dušše lunttaš.

Nårsa muitala vuodjima mannan buoret ja buoret, ja maŋemus vuodjimis son gal diđii áigá jo ahte son vuoitá. 

– Dát gal lei hirbmat somá! Ikte go vujiimet Guovdageainnus de dovden ahte skuter ii doaimma albmaládje. Ikte eahkes ja mannan ija mii justeriimet skutera ja dál doaibmagođii. Mus lei maid heitot vuolgga, nu ahte mun vudjen dan guhkit luotta vuosttaš vuorus jo vai bessen bivdit sin geat ledje mu ovddabealde, muitala Nårsa.


SÁPMELAŠ: Petter Nårsa lea sápmelaš Moskoselas eret ja lea beaivválaččat profešunella skutercross vuoddji Amerihkás. Govven: Roy Arthur Olsen

Stoahkagođiiga

Go ledje vuodján 5-6 geardde birra šilju, de dovddai Nårsa ahte dát manná bures. Son dadjá ahte soai Oskar Norumain stoahkagođiiga go Nårsa duobai Noruma gii lei njunnošis.

– Go Oskar ii lean vel vuodján dan guhkit luotta, de dihten ahte dál gal ii šat birge mus. Guhkit luotta ádjánii birrasiid 6 sekundda vuodjit, ja mun dihten ahte son galgá vel doppe finadit. Ii lean ávki viggat su meaddel ja su maŋábeallai bahkket, baicca vuodjit várrogasat go dihten ahte vuoitu lea mu, mojohallá Nårsa.

 

Ramppo šillju

Petter Nårsa dadjá ahte 35.000 ruvnno vuoitu ii lean dat buoremus vásáhus odne, muhto baicca dat ahte vuodjin doaimmai nu bures. 

Son háliida maid rámidit KMK ja sin geat leat ráhkadan ja divodedje šillju.

– Diehttelasat lei somá vuoitit ollu ruđa, muhto vel buoret dovdu bođii dainna go vuodjin manai nu bures, dadjá 27-jahkásaš skutercross násti ja joatká:

– Šilju lei hirbmat buorre. Sii geat dán leat ráhkadan gal leat čeahpit. Dan seammás maid lea somá gehččiide go diekkár hirbmat stuora njuikehaga vel ledje ráhkadan. Deike gal háliidan boahtte jagi maid boahtit.  

 

– Hirbmat duhtavaš

KMK Jođiheaddji May Helen A. Rasmus dadjá iežas hirbmat duhtavažžan lágiidemiin ja lea ilus go šilju doalai vaikke olgun lea bivval ja muohta suddá jođánit. 

– Mun lean hirbmat duhtavaš go ná bures manai, dat ii lean sihkar moadde beaivvi áigi go muohta suddagođii nu jođánit, dadjá jođiheaddji.


DUHTAVAŠ: KMK Jođiheaddji May Helen A. Rasmus lea duhtavaš lágiidemiin.
Govven: Roy Arthur Olsen

Lasihan vuoittu

KMK lasihii rievvárvuodjimis vuoittu 10.000 ruvnnuin dán jagi, ja dan čilge Rasmus sin dahkan go vuodjit ánssášit dan.

– Vuddjiide lea divrras boahtit deike, nu ahte mii háliideimmet lasihit vuoittu sidjiide. 

– Váillahahttet go ovttage dán jagi? 

– Mii váillahit dieđus vuddjiid dego Adam Renheima, Juho Virmakoski ja sin geaid roasmmehuvve ikte, loahpaha May Helen A. Rasmus. 

-Almmuhus-