Tiina Sanila-Aikio Sámi bálgosat searvvis muitala, ahte boazodolliin lea oktasaš fuolla ruvkedoaimmaid viiddideames Sápmái, go dál plánejit ohcat málmma Ergona geasse- ja čakčaguođohanguovllus Giehtaruohttasis.
Suoma bealde lea Sámi bálgosat searvi vuorjašuvvan go Dorvvolašvuohta- ja kemikáladoaimmahat Tukes mieđihii cuoŋománus málbmaohcanfitnodahkii Akkerman Finland oy:i guovlovárrema Giehtaruohttasa Jiehtáčearu guvlui, čállá Yle Sápmi. Fitnodat áigu bargat earret eará eanandutkamušaid 245 njealjehaskilomehtera sturrosaš guovllus ja ohcat málbmaohcanlobi ovdal várrenáiggi nohkama.
– Dakkár doaibmavuohki ii leat dohkálaš, mii dál lea ruvke- ja golleroggandoaimmain, mii boahtá doppe ruvkelágas. Sámi bálgosat leat miehtá Sámi guovllu Giehtaruohttasa bálgosa duohken, lohká ságadoalli Tiina Sanila-Aikio.
Várrenguovlu gokčá sullii 70 proseantta Giehtaruohttasa bálgosa Ergona siidda geasse- ja čakčaguođohanguovllu. Bálggus ii dohkket guovlovárrema. Tiina Sanila-Aikio oaivvilda lea veadjemeahttun heivehit ruvkedoaimma boazodollui go dat áitá sin ealáhusa ja kultuvrra boahtteáiggi.
