-Almmuhus-
OĐĐASATSámi áviissat sáhttet dál ohcat 36 miljovnna kruvnna

Sámi áviissat sáhttet dál ohcat 36 miljovnna kruvnna

-

-

Mediabearráigeahčču dieđiha ahte dál lea fas ohcanáigi sámi áviissaide main lea sámiálbmot ulbmiljoavkun. Áigemearri ohcat 36 miljovdnasaš doarjaga lea miessemánu logát beaivvi. Doarjjaortnet galgá láhčit dili demokráhtalaš digaštallamii, oažžut dieđuid ja ovdánahttit sámegiela sámi servodagas.

– Áviissat main lea sámiálbmot ulbmiljoavkun, leat mielde čalmmustahttimin sámi čállingiela, ja dain lea maid dehálaš rolla giellaovdáneamis sámi servodagas. Doarjjaortnet galggašii láhčit dili demokráhtalaš digaštallamiidda, juohkit dieđuid ja giellaovdáneapmái, lohká Mediabearráigeahču direktevra Mari Velsand preassadieđáhusas. 

Ávvir ja Ságat ožžo eanemus doarjaga diibmá

Leat olu sápmelaččat geat eai máhte lohkat sámi čállingiela ja geat leat sorjavaččat oažžut ođđasiid sámi álbmoga birra dárogillii. Danin sáhttet maid dárogiel áviissat, main lea ulbmiljoavkun sámiálbmot, oažžut doarjaga. Dán jagi juolluda Mediabearráigeahčču 35,7 miljovnna kruvnna sámi áviissaide doarjjaortnega bokte. Diibmá ožžo dát vihtta áviissa: Ávvir, Ságat, SÁMI ođasmagasiidna, Snåsningen ja Lokalavisa Nordsalten oktiibuot 36,6 miljovnna kruvdnosaš doarjaga. Ávvir ja Ságat ožžo eanemusat, oktiibuot 18,8 ja 13,6 miljovnna kruvnna doarjaga. Mediabearráigeahčču meannuda ohcamuša čavčča beallái. Eambbo dieđut: støtteordninga for samiske aviser.

-Almmuhus-