Mediabearráigeahčču lea juolludan 39 miljovnna ruvnnu doarjjan sámi aviissaide. Ávvir ja Ságat oažžuba eanemusat.
Ávvir, Ságat, Snåsningen ja NordSalten Avis ožžot oktiibuot sullii 39 miljovnna ruvnnu doarjjan 2022:s.
– Doarjja dahká sámegiela čállingielaid eanet oainnusin. Dáid aviissain lea dehálaš rolla sámi giellaovdáneamis, dadjá Mediabearráigeahču juridihkalaš ja regulatoralaš ossodaga jođiheaddji Hanne Nistad Sekkelsten.
Ávvir, mii almmuhuvvo davvisámegillii oažžu 20,3 miljovnna ruvnnu ja Ságat, mii ilbmá dárogillii, ges 17,2 miljovnna ruvnnu buvttadandoarjjan. Snåsningen oažžu 696 089 ruvnnu čálusosiid ovddas mat leat lullisámegillii, ja NordSalten Avis oažžu 870 111 ruvnnu čálusosiid ovddas mat ilbmet julevsámegillii.
– Lea sajáiduvvan politihkka ja hálddašandáhpi ahte sáhttá rehkenastit aviissaid sámegielalažžan ja oažžut doarjaga ortnega olis, vaikko čálletge dárogillii. Dat lea earret eará ákkastuvvon dainna ahte stuora oasit sámi álbmogis eai máhte lohkat sámegiela, lohká Sekkelsten preassadieđáhusas.
Ohcamušat biehttaluvvojit
Maiddái dán jagi ohcá Kronstadposten doarjaga davvisámegiel čállosiid ovddas. NordSalten Avis ges ohcá buvttadandoarjaga, lassin dasa ahte aviisa juo oažžu doarjaga čálusosiide lullisámegillii. Mediabearráigeahčču lea nugo diibmá, konkluderen biehttalit goappašagaid.
Kronstadpostena ohcamuš lea biehttaluvvon dan geažil go doarjjaortnet ii atte doarjaga davvisámi aviisasiidduide, dušše aviisasiidduide julev- ja lullisámegillii. NordSalten Avis ohcamuš biehttaluvvo danne go Mediabearráigeahčču oaivvilda aviissas ii leat sámi álbmot váldoolahusjoavku.
Mediabearráigeahčču biehttalii NordSalten Avis ohcamuša oažžut buvttadandoarjaga diibmá. NordSalten Avis váiddii biehttaleami, ja Mediaváiddalávdegoddi lea dál gieđahallan váidaga. Mediaváiddalávdegoddi gávnnahii ahte aviissas ii leat sámi álbmot váldoolahusjoavku, ja hilggui váidaga.
