-Almmuhus-
OĐĐASAT Sámi aviissaid lohkkiidlogut seamma dásis

Sámi aviissaid lohkkiidlogut seamma dásis

-

-

Sihke Ávvir ja Ságat bisuhit seamma olu lohkkiid go diibmá. Dan čájehit varas logut maid Mediebedriftens Landsforening almmuhii disdaga. 

Mediebedriftens Landsforening geahččá Norgga aviissaid deaddilanloguid ja lohkkiidloguid ja logut čájehit ovdáneami eanas Finnmárkku aviissain, ja sámi aviissat Ávvir ja Ságat leat daid gaskkas mat ovdánit veahá.. 

Oktiibuot 228 aviissa logut almmuhuvvojit, ja 168 dáin ovdánedje. 

Buorit logut Finnmárkkus

Oktiibuot leat 2,35 miljovnna lohkki Norgga aviissain, ja dat lea 2,5 proseantta lassáneapmi maŋemus almmuhuvvon loguid ektui. 

Finnmárkku aviissain leat Kyst og Fjord (8,12 %) ja Altaposten (7,63 %) mat ovdánit eanemusat proseantaloguin. Ságat ovdána njeljiin lohkkiin dan botta go Ávviris leat guokte lohkki lassánan. 

Hammerfestingen ja Sør-Varanger avis leat ges nuppe geahčen skála ja masset lohkkiid. 

– Duhtavaš go doalahit lohkkiid

Diimmá ektui leat Ávviris lassánan lohkkit ja dál leat 1201 olbmo geat beaivválaččat lohket ođđasiid sámegillii. 

Ávvira váldodoaimmaheaddji Kari Lisbeth Hermansen mielas ii leat stuora ovdáneapmi go guvttiin lohkkiin lassána, muhto dattetge lea duhtavaš dainna go leat lassánan lohkkit. 

– Mii leat duhtavaččat dainna go eai leat rukses logut, vaikko guokte ii gal leat alla lohku. Mu mielas lea buorre go leat nagodan doalahit lohkkiid ja ovdánan guvttiin, dadjá Hermansen, muhto ii leat áibbas sihkar dasa manne ovdáneapmi ii leat stuorit:

– Okta lea dieđus go mii čállit davvisámegillii, dat jo ráddje veaháš. Nubbi lea dieđus dat go mii eat nagot mannat nu viidát go áiggošeimmet, čilge váldodoaimmaheaddji. 

Ovdamunni buvttadit nehttii

Čakčamánus diibmá rievdadii Ávvir fokusa ja buohkat buvttadišgohte njuolga nehttii. Dan oaidná Hermansen ovdamunnin go ulbmil lea leat jođán neahtas. 

– Mii bargat ain beaivválaččat buvttadit buriid áššiid maid buohkat háliidit lohkat ja dat mainna mii leat ilus lea go mii oaidnit ahte mis lassánit neahttageavaheaddjit, ja dat lea mii movttiidahttá min buot eanemus go neahtain han mii olahit mihá viidábut, dadjá Hermansen ja lea maid ilus go Ságat ii ge masse lohkkiid:

– Lean hui ilus go nubbi sámi aviisa, Ságat, maid nagoda doalahit lohkkiid ja ovdána veaháš.  

Duhtavaš

Ságahat aviissa doaimmaheaddji Geir Wulff lea maid duhtavaš go logut eai leat ruoksadat, ja dadjá ahte plussa lea plussa vaikko lea dušše njealji lohkkis sáhka. 

– Mii leat ovdánan bures maŋemus jagi ja leat hui duhtavaččat dainna go sihke Ságat ja Ávvir ovdánit eai ge masse lohkkiid. Dat čájeha ahte sámi aviissain lea dehálaš doaibma servodagas. Mii háliidivččiimet dieđusge stuora lasáhusaid, muhto mii leat duhtavaččat go logut eai leat ruoksadat, dadjá Wulff ja muitala ahte guokte goalmmádasoasi Ságaha lohkkiin lohket báberaviissa eai ge neahtas. 

– Stuora eanet lohku min lohkkiin háliidit ain ođđasiid lohkat báhpiris ja oallugat eai eale nu digitála máilmmis. Erenoamážit Sámis leat ain oallugat geat ellet analoga máilmmis, muhto mis lea maid ođđaáigásaš neahttasiidu man mii ovdánahttit dađistaga, muitala Wulff. 

- Advertisement -
-Almmuhus-