Dat lea okta árvalus maid Norgga ohppiidorganisašuvdna lea árvalan Oahppodirektoráhtii. Dál galgá Oahppodirektoráhtta mannat čađa badjel 7000 cealkámuša ovdal go ođđa plánat biddjojit ja váldojit atnui 2020 čavčča, čállá NTB.
– Mii vuorjašuvvat. Vuolggasadji oahppoplánaid ođasmahttimii lei ahte galge unniduvvot vai ohppiide lea eambbo áigi oahppat dárbbašlaš diŋggaid. Odne mii leat guhkkin eret dien juksanmearis, dadjá Ohppiidorganisašuvnna jođiheaddji Alida de Lange D’Agostino.
Dárbbašmeahttun gealboulbmilat
– Máŋggain fágain leat evttohuvvon viiddit gealboulbmila, ja olu dain leat dárbbašmeahttumat. Mii meidnet ahte sáhttá čuolastit gealboulbmila, earret eará sámi alfabehta, čáži birrajohttima ja beali risttalašvuođaoahpus, dadjá jođiheaddji.
Badjel 7000 cealkámuša
Oahppoplánat leat maŋimuš rievdaduvvon 2006:s.
Oahppodirektoráhtta lea vuostáiváldán badjelaš 7000 cealkámuša iešguđet aktevrrain ja eaŋkilolbmuin.
Ohppiidorganisašuvdna meidne lea áigi vuoruhit dan maid oahppit duođaid dárbbašit oahppat skuvllain.
Maŋimuš áigemearri buktit oaiviliid árvaluvvon oahppoplánaide fágaođasteami oktavuođas lei geassemánu 18. beaivvi. Dán čállá NTB.
