Suoma beale Sámedikki ságadoalli Tuomas Aslak Juuso bovde buohkaid ávvudit Sámi álbmotbeaivvi njuolggosáddaga bokte guovvamánu guđát beaivvi tiibmu guđas Suoma áiggi mielde.
– Dat beaivi lea dehálaš sápmelaččaide. Dábálaš dilis čoahkkanivččiimet oktii nu Sámis go dan olggobealdege ávvudit min álbmoga. Dál spiehkastatdili áigge eat sáhte čoahkkanit fysalaččat, muhto sávan ahte virtuáladáhpáhusa bokte lihkostuvvat gaskkustit iežamet beales ávvodovdamušaid buot sápmelaččaid ruovttuide, lohká ságadoalli Tuomas Aslak Juuso preassadieđáhusas dáhpáhusa birra.
Dán sáddagis sádde ságadoalli álbmotbeaivvi dearvvuođaid ja gullat dás sámemánáid dearvvuođaid ja gussiid jurdagiid álbmotbeaivvi birra. Muđui fállojuvvo musihkka ja oanehisfilbma. Dáhpáhusa beasat čuovvut čujuhusas www.sajos.fi/live. Sátta álgá tiibmu 18.
Sáhtát ieš oassálastit. Sáddes Sámi álbmotbeaivve dearvvuođaidat nummirii +358 40 663 4493 teakstadieđuin dahje Whatsapp bokte. Sáhtát maiddái guođđit dearvvuođaid Twitteris symbolain #SámiÁlbmotbeaivi.
Jus leažžat Anáris, de lea Sámekulturguovddáš Sajosa restoráŋŋa Čaiju rabas tiibmu 14–21.30 ja beaivvi borramušlisttas leat gumposat.
