-Almmuhus-
-Almmuhus-
OĐĐASAT – Sámevuohta ii namuhuvvo sániinge álbmotmehciid mearkagálvohuksemis

– Sámevuohta ii namuhuvvo sániinge álbmotmehciid mearkagálvohuksemis

-

-

Sámedikki bokte nammaduvvon álbmotmeahccestivrraid áirasat moitet go Innovašuvdna Norga ii namut sámevuođa álbmotmehciid mearkagálvohuksemis.

Dál lea riikka álbmotmeahccestivrra Troandimii čoahkkanan ja oahpásmahtton álbmotmehciid mearkagálvostrategiijaide ja mo dát sáhtášii doaibmat riikkaidgaskasaš márkanis.

Áirasat geat leat Sámedikki bokte nammaduvvon stivrraide ohcalit ahte sámegiella ja -kultuvra čalmmustahttošii dán áŋgiruššamis.

 – Innovašuvdna Norga ii namut sámekultuvrra sániinge iežas ovdanbuktimis, muhto gohčoda dan báikkálaš kultuvran ja eallinvuohkin mii lea erenoamážit čadnon Davvi-Norgii, dadjá Ragnhild M. Aslaksen guhte lea Várnjárgga álbmotmeahccestivrra jođiheaddji, preassadieđáhusa bokte.

 

– Čihket sámekultuvrra

Maiddái Dieváidvuovddi álbmotmeahccestivrra Geir Johnsen čuovvola moaitámušaid.

 – Vuot čihket sámi kultuvrra našunála áŋgiruššamiin. Mis leat sihke sámegiel namat álbmotmehciin, ja kultuvra ja sámi iešvuohta livčče boahtán buorrin dákkár mearkagálvohuksemis, dadjá son.

 

– Dohkketmeahttun

Mariann Wollmann Magga, Báhčaveaji álbmotmeahccestivrras ja Arild Pettersen Inga, Møysalen Nasjonalparkstyre Nordlánddas oaivvildeaba leat dohkketmeahttumin go sihke sámi mátkeealáhus ja boazodoallu lea oalát vajálduhtton go dán han sihke sis- ja olgoriikka turisttat háliidit vásihit.

 – Našunála institušuvnnain ja etáhtain lea dás dehálaš ovddasvástádus čalmmustahttit ja muitit sámevuođa. Badjel bealli Norgga nannáma álbmotmehciin han leat ásahuvvon guovlluide gos sápmelaččat ásset ja guovlluin gos leat sámegiel namat, deattuheaba Bargiidbellodaga áirasat álbmotmeahccestivrrain.

 

Čujuha Birasdirektoráhttii

Innovašuvdna Norgga ossodatdirektevra Audun Pettersen geas lea bajimus ovddasvástádus doaimmaide mat gusket mátkeealáhussii ja kultuvrii, lohká sutnje váttisin kommenteret dán ášši, go muitala iežas logaldallanfáttá Troanddimis leamaš mo turisttaid áddejupmi lea álbmotmehciid birra.

– Mearkagálvostrategiija lea Innovašuvdna Norga ráhkadan Birasdirektoráhta ovddas, čállá Pettersen SMS bokte.

 

 

- Advertisement -
-Almmuhus-