-Almmuhus-
OĐĐASATSáme­vaši easta­deami doaibma­plána lea mearri­duvvon 

Sáme­vaši easta­deami doaibma­plána lea mearri­duvvon 

-

-

Ikte mearridii Sámedikki dievasčoahkkin Sámedikki doaibmaplána sámecielaheami vuostá 2022-2025. Bargiidbellodat lei evttohan sáddet ášši ruovttoluotta ođđa geahčadeapmái, muhto evttohus gahčai.

Čoahkkimis ledje oktiibuot 39 jienasteaddji, 15:s dorjo Bargiidbellodaga evttohusa ja 24:s ledje vuostá. Oassi Nordkalottfolketis dorjo evttohusa. 

– Bb váillaha ahte Sámediggeráđđi ovddida konkrehta doaimmaid maid Sámediggi galgá bargat vai eastadit sámevaši. Mii ohcalat sihke olmmošlaš ja ekonomalaš resurssaid, go lea dehálaš čájehit ahte Sámediggi váldá ovddasvástádusa iige duvdde earáide, dajai Sámedikki Bb parlamentáralaš jođiheaddji Ronny Wilhelmsen Ávvirii árat dán vahkkus.


Buoridanmunni

Nordkalottfolket Sámediggeáirras, Vibeke Larsen, muitala ahte sii oaivvildit ahte doaibmaplána lea dehálaš, muhto leat ovttaoaivilis Bargiidbellodagain ahte sáhtašii leat buoret ja danin maid dorjo sin evttohusa.

– Mii oaivvildat ahte doaibmaplána sáhtašii leat strukturerejuvvon earáládje. Ii juohkelágan vašši leat kriminealla, ja lea dehálaš earuhit dáid kategoriijaide, ja de sirret doaimmaid daid iešguđetge kategoriijaide, dadjá Vibeke Larsen. 

Go Bargiidbellodaga árvalus gahčai, Nordkalottfolket dorjo Sámediggeráđi doaibmaplána árvalusa, muhto sii leat buktán mearkkášumi ahte movt sáhttet rievdadit doaibmaplána vai šattašii buoret.

BUORIDANMUNNI: Nordkalottfolket Sámediggeáirras, Vibeke Larsen, oaivvilda doaibmaplánas lea buoridanmunni. Govven: Sarah Mariell Balto. 
BUORIDANMUNNI: Nordkalottfolket Sámediggeáirras, Vibeke Larsen, oaivvilda doaibmaplánas lea buoridanmunni. Govven: Sarah Mariell Balto. 

Hirbmat bargu

Nordkalottfolket áirasat oaivvildit ahte Sámediggi ii sáhte okto dahkat visot ja ahte lea olu bargu mii olles servvodagas ferte dahkkot, earret eará oahpahit stuorraservvodaga sápmelaččaid birra. 

– Dá lea hirbmat bargu, ja danin lea bággu ráđđádallat stáhta ásahusain vai nagodat čoavdit váttisvuođa. Muhto vaikko Sámediggi ii sáhte oahppoplánaid rievdadit, de lea olu bargu mii ovdagihtii ferte dahkkot, dadjá Sámediggeáirras, Vibeke Larsen. 

Áššis ledje golbma eará evttohusa smávva rievdademiide mat mearriduvvo go 38:s dorjo ja 1 vuosttildii. Sámediggi doarju muđui Sámediggeráđi árvalusa ovttajienalaččat. 

Loga maid:
– Mii dárbbašat dál kultuvra­rievdadeami. Ii galgga sosiála­laččat dohkke­huvvot cielahit nuppi olbmo

-Almmuhus-