Guovtti jagi áigi heaittihuvvui konferánsa korona dihte.
Miessemánu 19. beaivvi lea Sámi Parlamentáralaš Ráđđi gearggus lágidit guđat sámeparlamentarihkkariid konferánssa Anáris. Guokte maŋimuš jagi lea konferánsa heaittihuvvon koronapandemiija dihte.
Ovttabeaivásaš konferánsii servet ráđđelahtut Norggas, Suomas ja Ruoŧas. Ruoššabeale sámeorganisašuvnnaid ovddasteaddjit oassálastet dárkojeaddjin konferánsii.
– Buorre ahte sámeparlamentarihkkarat besset dál čoahkkanit Anárii ságastallat oktasaš hástalusaid birra áššiin mat laktásit dálkkádatnuppástussii, árbevirolaš dihtui sihke sámiid vuoigatvuođaid maŋimuš áiggiid ovdáneapmái, dadjá Suoma Sámedikki presideanta, Tuomas Aslak Juuso, preassadieđáhusas.
Dán jagáš konferánssa fáttát leat earret eará dálkkádatnuppástus, árbevirolaš diehtu ja sámiid vuoigatvuođaid maŋimuš áiggiid ovdáneapmi.
