Sámenuoraid dáiddadáhpáhus lágiduvvo Heahtás cuoŋománu 19. beaivvi, váldofáddá lea dánsa ja sámefáddá ges duodji.
Sámenuoraid dáiddadáhpáhus lágiduvvo Heahtás cuoŋománu 19. beaivvi, váldofáddá lea dánsa ja sámefáddá ges duodji.
Sámenuoraid dáiddadáhpáhus bistá beaivvi, ja lágiduvvo Heahtá skuvlaguovddážis cuoŋománu 19. beaivvi. Dáhpáhusa váldofáddán lea dánsa ja sámi temán duodji. Dáhpáhus álgá diibmu 11:s.
Dál sáhttá almmuhit
Dánsunjoavkkuid almmuheapmi lea dál álgán.
– Oahpaheaddjit dahje bagadeaddjit sáhttet almmuhit iežaset joavkkuid dušše interneahtas Webropol-prográmma bokte. Almmuheapmi lea rabas njukčamánu 31.beaivvi rádjái, man maŋŋá prográmma giddejuvvo. Maŋŋonan almmuhusaid eat sáhte váldit vuhtii, čállá dáiddadáhpáhusa buvttadeaddji Xia Torikka preassadieđáhusastis.
Webropolii beasat dán liŋkkas.
Válljejit muhtimiid MOVES 2017 dáhpáhussii
Sámenuoraid dáiddadáhpáhusa njuolggadusat leat muđui seammá go Nuorra Kultuvra MOVES 2017 -dáhpáhusas, muhto dasa ožžot oassálastit maiddái vuollel 10 jahkásaččat.
– Dáiddadáhpáhusas válljejuvvojit ovddasteaddjit geat besset vuolgit Roavvenjárgii MOVES 2017 – dáhpáhussii, čállá buvttadeaddji.
Dát doalut lágiduvvojit miessemánu 26.-28. beivviid.
MOVES-dáhpáhusa njuolggadusaid gávnnat dás.
Sámi fáddán lea duodji
Dáiddadáhpáhusa sámefáddán lea duodji.
Duodješládja lea friija ja dasa ožžot oassálastit mánát ja nuorat juohke ahkeluohkás.
– Duojis galgá oidnot maiddái duojára duogáš. Duoji mielde galgá leat sámegielat teaksta duoji ja duojára birra, sihke iežár (selfie) duojáris ja gárvves duojis, čállá Torikka.
Dujiid lohku ii leat ráddjejuvvon.
– Gárvves duojit galget leat doaimmahuvvon Sajosii dahje Heahtá skuvlaguovddážii maŋimustá cuoŋománu 11. beaivvi. Mii eat sáhte váldit maŋŋonan dujiid mielde gilvui, čállá buvttadeaddji.
Xia Torikka sávvá buohkaide somás ráhkkananáiggi sámenuoraid dáiddadáhpáhussii.
