Oulu universitehta Giellagas-instituhta sámekultuvrra professor, Veli-Pekka Lehtola (65), manná ealáhahkii. Dan oktavuođas lágidit ávvuseminára Oulus odne sámi álbmotbeaivvi.
– Lean suopmelaččaide čilgen dan sámi historjjá ja sámi áššiid, vai oažžut sámi jiena gullot maiddái Suoma servodagas. Nuppe dáfus mun lean sápmelaččaide geahččalan máhcahit dan dieđu, mii lea dábálaččat doppe arkiivvain ja vehá dego vajálduvvan, dadjá Lehtola Yle Sápmái.
Lehtola lea bargan birrasiid 20 jagi sámekultuvrra professorin. Lehtola lea almmuhan logenár girjji. Sámit ja sámiid historjá leat leamašan guovddáš fáttát su dutkamušain.
