Olu váhnemiid mielas lea hástaleaddji go mánát bidjet nu olu áiggi dihtorspealuide. Mánát ieža fas háliidivčče váhnemiid áŋgiruššat eambbo. Mediabearráigeahčču rávve mo bearrašat galget humadit dihtorspealuid birra ja šiehttat áiggi.
Measta buot mánát liikojit dihtorspealuide, ja oallugiidda lea dat dehálaš astoáigedoaibma.
Váhnemat sáhttet jierásmuvvat dahje oaivvildit ahte spealut váldet beare stuora saji.
Mediabearráigeahčču lea ráhkadan gihppaga mas leat rávvagat váhnemiidda mo galget hupmat dihtorspealu birra bearrašis ja mo šiehttat áigegeavaheami ja guđiid spealuid mánát ožžot speallat.
– Mii áigut geahpidit váhnemiid dili vai sidjiide lea álkit hupmat dihtorspealuid birra mánáiguin iežaset eatnigillii, dadjá Mediabearráigeahču direktevra, Mari Velsand, preassadieđáhusas.
Mediabearráigeahču stuora iskkadeapmi «Barn og medier 2018» logut čájehit ahte 96 proseantta gaskal 9- ja 18-jahkásaš bártniin ja 63 proseantta nieiddain bidjet áiggi dihtospealuide.
Iskkadeapmi čájeha maid ahte mánáid ja nuoraid mielas váhnemat eai doarvái áŋgiruša sin digitála aktivitehtain.
