Fertejit veardidit galget go virgádit lassi sámegieloahpaheddjiid.
Boahtte skuvlajahkái leat lagabui 100 oahppi dieđihuvvon sámegieloahpahussii Roavvenjárggas. Dat lea stuora lassaneapmi diimmá loguid ektui go ledje 63 oahppi sámegieloahpahusas.
Oahppit leat 22 iešguđetge skuvllas gávpogis, ja lea dušše Ylikylä skuvla gos lea sierra sámegieloahpaheaddji. Eará skuvllain ožžot oahppit sámegiela gáiddusoahpahusa bokte.
Roavvenjárgga oahppohoavda Jussi Kainulainen lohká Yle Sápmái ahte ná stuorra rievdadusa eai lean máhttán vuordit.
– Dát lea dušše positiiva ášši, ahte beroštupmi lea lassánan, dadjá Kainulainen.
Jus oahppiidlohku ain lassána dahje bissu seamma dásis boahtte jagi, de lohká oahppohoavda fertet veardidit galget go virgádit ovtta vel sámegieloahpaheaddji.
