Oahppit geain leat gullanváttut sámi guovlluin sáhttet oažžut sihke sámegiela ja mearkagiela vuosttašgiellan, eai ge dárbbaš válljet eret sámegiela vuosttašgiellan.
Oahppit geain leat gullanváttut sámi guovlluin sáhttet oažžut sihke sámegiela ja mearkagiela vuosttašgiellan, eai ge dárbbaš válljet eret sámegiela vuosttašgiellan.
Gitta 2015 giđđii ii leat leamaš vejolašvuohta ahte lea sihke sámegiella ja mearkagiella vuosttašgiellan. Dat lea dagahan váttisin skuvlii hálddašit áššiid main leat bealjehis sámi mánát. Mánáid ovddasteaddjit leat šaddan válljet sámegiela eret vuosttašgiellan mearkagiela dihte.
Dál čállá Oahpahusdirektoráthta johtočállosis «Fága- ja diibmojuohkin ja fálaldatstruktuvra Máhttoloktemii Udir-1-2015» ahte oahppit sáhttet oažžut oahpahusa sihke mearkagillii ja sámegillii vuosttašgiellan.
Buorit ja heajos bealit
Oahpahusdirektoráhtta čilge ahte nuppástusa vuolggasadji lea ahte oahppi čuovvu mearkagiellaoahpahusa vuođđoskuvllas, muhto leat liigediimmut sámegiela oahpahussii.
– Ovdamunni lea ahte sámegielat ja dárogielat oahppit ožžot seamma vuoigatvuođaid. Dat mii ii leat nu buorre lea ahte sáhttet šaddat oalle ollu diimmut ohppiide, dadjá Oahpahusdirektoráhta seniorráđđeaddi Bente Heian.
Geatnegasvuohta oahppat sámegiel mearkagiela
– Ii gávdno sámegiel mearkagiella ja dan dihte fertejit oahppit čuovvut oahppoplána dárogielmearkagillii. Sámi mánát, geain leat gulluváttut, eai leat sáhttán guokte vuosttašgiela válljet, muhto mánáin geain lea dábálaš gullu leat dan sáhttán. Dál mis lea eambbo dásseárvosaš meannudeapmi ja mii addá čielga geatnegasvuođaid suohkaniidda. Muhtin váhnemat leat ožžon álkit dili go eai dárbbaš válljet eret sámegiela vuosttašgiellan mearkagiela dihte, dadjá Davvi-Norgga gullofágalaš nannendoaimmaid ovddeš prošeaktajođiheaddji Hilde Sundve Jordheim.