-Almmuhus-
-Almmuhus-
-Almmuhus-
OĐĐASATSámegiel oahpponeahttasiidu almmuhuvvo Tråantes

Sámegiel oahpponeahttasiidu almmuhuvvo Tråantes

-

-

Dál ožžot davvisámegielat oahppit ja oahpaheaddjit nuvttá oahppomateriála iežaset gillii, ja oahppit Davviriikkain besset buorebut oahppat sámi giela ja kultuvrra birra.

Sámi oahppit ja oahpaheaddjit ožžot dál nuvttá oahppomateriála Davviriikkaid kultuvrra birra, iežaset gillii. Bearjadaga guovvamánu 10.beaivvi almmuhuvvo sámegiel neahttasiidu maid birrasii 8000 oahpaheaddji geavahit Davviriikkain.

 

Oahppat gulahallat riikkaráji badjel

– Mihttu lea nannet máhtu Davviriikkaid giela ja kultuvrra birra, ja addit mánáide ja nuoraide vejolašvuođa oahppat gulahallat riikkarájiid rastá, čilge Norden i Skolen prográmmahoavda Thomas Henriksen.

Henriksen illuda almmuhit davvisámegiel veršuvnna Tråantes, Scandic Lerkendalas.

 

Sáhttet oahpahusas geavahit dieđuid

Norden i Skolen fállá neahta bokte oahppomateriálaid Davviriikkaid ránnjágielaid, dálkkádaga ja luonddu birra, maid oahpaheaddjit sáhttet geavahit go oahpahit.

Oahppoportálas sáhttá searvat skuvlachattii, ustitvuođaluohkáide ja gilvvuide birrasa ja nuoskkideami birra, ja dan bokte sáhttet oahppit gulahallat eará mánáiguin ja nuoraiguin miehtá Davviriikkaid.

 

Sávvá buoret ipmárdusa

Sámiráđi presideanta Áile Javo lea ilus go oahppomateriálat leat sámegillii.

– Mun lean hui ilus go Norden i Skolen lea jorgaluvvon sámegillii dál. Sámegiel oahppomateriála ja eará skuvlaávdnasat váilot sámegillii, ja danne lea dehálaš ahte dakkár resurssat jorgaluvvojit sámegillii. Lea maid hui illudahtti go Davviriikkaid mánát besset buorebut oahpásmuvvat sámegillii ja sámi kultuvrii, go mii diehtit ahte majoritehtaálbmogis váilu doarvái máhttu sámiid birra. Mu sávaldat lea ahte ođđa buolvvat ožžot buoret ipmárdusa ahte sámit leat sajáiduvvan oassi Davviriikkain, lohká Javo.

-Almmuhus-